La stagiun haja cumenzà cun bler sulegl il matg e zercladur, il fanadur bletsch ha dentant carmalà pauca glieud en las muntognas. Sco l'associaziun scriva, hajan cunzunt las pendicularas cun blers osps indigens sentì la trid'aura. Las regiuns cun ina gronda cumpart da turists e turistas da l'exteriur hajan gì dapli entradas, damai che quella clientella na decidia betg uschè spontan.
Cumpareglià pli lunsch enavos vesa quai dentant ora mender per il Grischun. Dal matg fin la fin da fanadur 2025 han las pendicularas grischunas gì 10% pli paucas emprimas entradas che la media da tschintg onns. E quai entant che tut las autras regiuns han nudà dapli osps. Sur l'entira Svizra hai dà 27% dapli emprimas entradas che la media da tschintg onns.
Quellas cifras mussian che la fatschenta da stad daventa adina pli impurtanta per las pendicularas. Dentant era che las pendicularas èn dependentas da l'aura. L'experientscha mussia ch'er ils mais avust fin october pon carmalar blera glieud en las muntognas, uschia Berno Stoffel, president da Pendicularas Svizras. Las interpresas guardian uschia plain fidanza vers la segunda mesadad da la stagiun.
