Christoph Passecker sa retira per raschuns famigliaras. Sia famiglia haja decidì da turnar cun lur dus uffants da vegliadetgna da scoletta en l'Austria, nua ch'il tat e la tatta sajan dachasa. La decisiun na saja dentant betg stada simpla, ha Christoph Passecker ditg envers RTR. Otg onns è il directur administrativ partent stà emploià tar Savognin Pendicularas SA – sis da quels otg onns sco directur administrativ.
Optimistic per il futur da las pendicularas
Guardond enavos sin quels onns tar las Pendicularas da Savognin di Passecker, ch'el saja losch sin il project da la nova pendiculara da Savognin a Tigignas, sco era sin il management da crisa durant la pandemia. Er il nov model da pretschs dinamics haja sa mussà sco success, malgrà sceptica a l'entschatta. Savognin saja daventà sia segunda patria, ha Passecker punctuà. Dir adia ad amis, collegas ed a la regiun saja grev. Per il futur da las pendicularas è el optimistic. «Savognin vegn era l'onn 2050 a restar ina destinaziun da skis populara – malgrà il midament dal clima». Professiunalmain surpiglia Passecker ina nova funcziun sco manader da finanzas d’ina interpresa pli gronda – dentant en in auter sectur che la branscha da pendicularas.
I fa mal da dar si mia professiun da siemi.
En Surses deploresch'ins che Christoph Passecker – «il partenari fidà dal turissem, da la politica, da l'economia e dals purtaders turistics» – banduna la regiun. En ses otg onns ha Passecker tranter auter realisà la nova telecabina da Savognin a Tigignas. Las Pendicularas Savognin vulan preschentar a la radunanza generala, il settember, il successur u successura da Christoph Passecker.