L'emprima impressiun sin las vias da Cuira n'è betg gist quella ch'i vegniss fatg dapli donaziuns durant il temp d'advent che durant il rest da l'onn. «Nus faschain donaziuns durant tut l'onn. Imports mensils, per exempel per il WWF u er per il center da paraplegia. En quest senn nagut spezial a Nadal», di ina dunna ch'è da viadi cun sias duas figlias.
In'autra manegia: «Per l'Africa hai jau gist cumprà in rom da vistga. Jau fatsch simplamain spontan sche insatgi ma pledenta». In bab giuven di: «Na, atgnamain main, perquai che momentan è noss budget per la famiglia stretg. Nus stuain guardar sezs dals daners e n'avain nagut da la vart per donaziuns. Deplorablamain.»
Nus stuain guardar sezs dals daners e n'avain nagut da la vart per donaziuns. Deplorablamain.
Ed er per ina ulteriura dunna è l'advent betg il temp da donaziuns: «Jau fatsch simplamain donaziuns adina puspè durant l'onn, surtut en il sectur da la protecziun dals animals u quai che pertutga animals, ma ussa betg spezialmain per Nadal, mabain sco ditg durant l'onn.»
In maletg sumegliant sa mussa tar la Crusch Cotschna dal Grischun. Diego Deplazes, il mainafatschenta da l'organisaziun umanitara cun radund 13'000 commembras e commembers en il Grischun, di: «Nadal è segir in mais impurtant perquai ch'ins è forsa pli sensibilisà da far ina donaziun. Ins ha forsa gì in onn ch'è ì fitg bain, ins vesa ch'ins vul far insanua insatge dal bun ed uschia poi esser ch'i vegn ina donaziun u l'autra dapli, ma en general avain nus nossas donaziuns che vegnan durant tut l'onn.»
Ed er sch'ins guarda sin ils onns passads n'hai tenor Diego Deplazes betg dà grondas midadas en il cumportament da far donaziuns. Cun ina excepziun: «L'onn da corona è stà in onn fitg spezial. Forsa, ma quai èn tut mo supposiziuns che nus faschain, poi esser che la solidaritad è sa mussada pli ferm, perquai che la populaziun ha stuì vesair ch'ins sto star ensemen. Giuvens ed attempads, ins ha sustegnì betg mo cun daners mabain er cun far purschidas e quai po esser in factur ch'ins ha vis ch'i dovra ina solidaritad ed uschia èn las donaziuns stadas bler pli grondas.»
Nus vesain che dapli persunas fan ina donaziun, ma che las donaziuns èn pli pitschnas.
In pau auter che tar la Crusch Cotschna sa mussa la situaziun tar l'organisaziun d'agid Caritas Grischun. La manadra Gabi Conradi manegia: «Nus survegnin il december segir dapli donaziuns. Igl è il temp d'advent nua che la glieud è contemplativa, sa mussa solidarica cun conumans che n'han betg uschè bler daners u che na pon betg ademplir giavischs d'uffants e regals per Nadal. Quai remartgain nus.»
La Caritas survegnia tant donaziuns en furma da daners sco er en furma da chaussas. E Gabi Conradi di ch'ins observia er: «Ins na po anc betg propi trair in facit. Ma nus vesain che nus avain dapli persunas che fan ina donaziun, ma che las donaziuns èn pli pitschnas».
Il far donaziuns para pia dad esser in tema fitg individual. Tgi fa regularmain durant l'onn ina donaziun, tgi utilisescha la fin da l'onn per far dal bun ad insatgi auter e tgi n'ha gnanc la pussaivladad da far.