La vischnanca da Tavau na po betg elavurar in project da construcziun per in nov center da traffic. Cun 1'728 cunter 1'645 vuschs ha il suveran renvià il credit da 2,1 milliuns francs. Uschia è la fatschenta giud maisa. Quest center da traffic avess cumpiglià in nov terminal da bus, ina nova staziun per il tren ed in nov traject da via. Ils 2,1 milliuns francs avess'ins duvrà per elavurar il project da construcziun. In segund pass avess tenor stimaziuns prevesì custs da 108 milliuns francs.
La situaziun da traffic tranter la staziun da tren Tavau Vitg, la staziun da val Parsenn e la plazza da parcar resta uschia nuncuntentaivla. Il plaz limità ed il bler traffic chaschunan adina puspè situaziun privlusas. Perquai ha Tavau lavurà dapi il 2021 vi d'in «Masterplan» per il center dal vitg.
Part da quest project avessan fatg las suandantas midadas:
- spustar la staziun da tren Tavau Vitg per 200 meters sin l’autezza da la staziun a val da la funiculara Parsenn
- là fiss stà prevìs in nov terminal da bus ed ina garascha da parcar
- ed in nov traject da traffic cun duas rundellas.
Tenor la vischnanca da Tavau fissi uss stà il dretg mument per realisar il project, cunquai ch’ella è en ina buna situaziun finanziala. En pli stoppia la Viafier retica sanar la staziun da tren pervi da la lescha davart l’egualitad da persunas cun impediment.
La viafier sezza avess gugent spustà la staziun, ha ella ditg envers il schurnal regiunal dad SRF. Uss cunquai che la populaziun ha ditg Na, vegn simplamain renovada la staziun existenta.
Dals custs nà saja quai in gieu da summa null. Perquai che la Viafier retica po tenor la Confederaziun duvrar ils custs per la staziun veglia u era per la nova. La Retica fa quint cun 25 milliuns francs per ses project.