A la vischnanca da Schmitten – che sa chatta tranter la Val d'Alvra e la regiun da Tavau – stat l'aua fin al culiez. Per pudair far las investiziuns necessarias manchian mintg'onn 250'000 francs. Plinavant vegnan las reservas d'agen chapital ad esser duvradas en il pli tard dus onns.
La mancanza da finanzas fa fitg gronds quitads a nus.
Er in augment dal pe da taglia na gidass betg en questa situaziun. Ina fusiun saja pia nunevitabla, ha ditg Marc Fürsinger la fin da l'avrigl passà vers RTR.
Tavau è pront da fusiunar – ma sut cundiziuns
Ina retschertga consultativa tar la populaziun da Schmitten ha mussà: Ils blers preferissan da fusiunar cun Tavau. Dad ina vart van ils uffants da Schmitten a scola a Tavau. Da l'autra vart èn tuttas duas vischnancas tudestgas – auter che da l'autra vart nua che Albula/Alvra u Bravuogn/Filisur èn vischnancas rumantschas. Il chantun avess preferì ina fusiun cun ina da quellas vischnancas, sustegna dentant er la fusiun cun Tavau.
Uss ha la suprastanza da Tavau piglià posiziun uffizialmain e sa mussa pronta da fusiunar. I dettia dentant intginas cundiziuns. L'Uffizi chantunal da vischnancas duai surpigliar la moderaziun ed il lead en chaussa. Plinavant duai la dumonda dals custs vegnir sclerida oravant – spezialmain tar in eventual Na ad ina fusiun. Plinavant veglia Tavau sa laschar temp e betg realisar ina fusiun en «temp da record». Ins veglia ch'i dat ina votaziun da consultaziun a Schmitten ed almain trais quarts da la populaziun duain dir Gea.
«Las cundiziuns che Tavau metta per la fusiun fan la parita sco sche la citad na veglia betg propi Schmitten. Quai ston ins metter en context:
Tavau è ina vischnanca cun bleras fracziuns: Laret, Wolfgang, Monstein, Dorf, Platz, Clavadel, Sertig e Wiesen. In'ulteriura fracziun n'è betg sin l'agenda da quels da Tavau. Tar ils abitants da Tavau sez dominescha plitost il WEF u spazi d'abitar per indigens. Plinavant èn las fracziuns ferm en ina cuminanza per sasez – er ord motivs istorics, culturals e geografics.
Perquai vuless la regenza da Tavau er in fitg cler signal da la populaziun da Schmitten – quasi in clom da reclama da Schmitten en favur d'ina fusiun.»
Toni Poltera, redactur Grischun Central
Proxims pass: analisar
La suprastanza da Schmitten preferiss che tut il process giess atras uschè svelt sco pussibel. Il squitsch finanzial è numnadamain grond. Sco emprim sto dentant vegnir analisada la situaziun: Tge investiziuns ston vegnir fatgas, tge custi da mantegnair e manar l'infrastructura ed uschia vinavant. Plinavant sto l'uffizi da vischnancas a Cuira vegnir en acziun. Quel aveva bain gia oravant signalisà da porscher maun per ina fusiun, la fusiun sco tala dentant è chaussa da las vischnancas involvidas.
Realistic è ch'ina fusiun tranter Tavau e Schmitten va en vigur il pli baud entschatta 2027.
