D'ordaifer guarda la baselgia evangelica da Favugn or sco ina baselgia «normala», endadens manca dentant insatge: ils bancs. Els èn svanids or da la nav – uss stat ina gronda maisa da 8,4 meters lunghezza entamez la baselgia. Ella porscha plazza per circa 30 persunas. «La maisa stat per communitad», di il plevon Fadri Ratti ch'ha davent da l'entschatta accumpagnà il project da modernisar la baselgia. L'idea è naschida ensemen cun il teolog da Turitg Matthias Krieg che s'occupescha dal diever da baselgias. El ha sa laschà inspirar dal maletg da Leonardo Da Vinci, l'ultim Sontga Tschaina.
Plevon envida a maisa
Er ils cults divins duain avair lieu sin la maisa, «Uschia essan nus tuts sin in livel, quai na dat nagina ierarchia pli», di il plevon. Lura datti magari er in café ubain in toc paun u chaschiel per la Sontga Tschaina. La glieud vegnia uschia en discurs ed il servetsch divin daventia pli famigliar e pli luc. Insumma duai la baselgia vegnir nizzegiada dapli da la populaziun. Uschia èn er planisadas meditaziuns ubain cults divins per uffants etc. Dentant ina «sala plurivalenta» na saja la baselgia betg: «Per festas ubain per la politica datti avunda autras localitads en il vitg, la baselgia è e resta ina baselgia».
E per las persunas ch'avevan gugent ils bancs e giudevan dad esser per sasez durant il cult divin fa il plevon Fadri Ratti mintga mais in cult divin «classic». Lura vegn la maisa prendida or da la nav e remplazzada cun sutgas. Dal reminent: Dal tut svanids n'èn ils bancs betg, or d'ina part dad els han ins fatg la maisa.
Lavur da persvasiun
L'idea ch'è unica en Svizra ha dentant a l'entschatta duvrà in zic lavur da persvasiun tar ils sponsurs da la renovaziun ch'ha custà 1,2 milliuns francs. Quasi tuts sajan stads in zic sceptics, hajan dentant laschà persvader dal concept. Er la protecziun dals monuments è suenter avair examinà l'interiur da la baselgia vegnida tar la conclusiun che la maisa persvada: «Nus essan ils advocats da la substanza d'ina baselgia e qua essan nus vegnids tar la conclusiun ch'ins perda main che quai ch'ins gudogna», di Simon Berger, manader da la protecziun da monuments. Il project da Favugn na saja dentant betg transferibel sin tut las autras baselgias. «Magari è la substanza or d'in temp ch'ella ha ina gronda valur, lura na pon ins betg remplazzar ella», agiunta el. Mintga baselgia saja da giuditgar individualmain.