Votantas e votants da Favugn han refusà il project d'in nov bajetg per la gruppa forestala inclus in deposit per materia da valur. Sco il president da la vischnanca Peter Camastral ha ditg envers RTR han radund trais quarts da la radunanza communala ditg Na ad in credit da 4 milliuns francs.
Plinavant giavischa la radunanza communala che la suprastanza sclereschia eventualas cooperaziuns cun autras vischnancas. Talas cooperaziuns èn gia vegnidas examinadas avant in pèr onns. In consorzi cun Tumein ha fatg naufragi pervi dal stgars Na da la radunanza communala da Tumein. Ina cumpra da prestaziun tar la vischnanca da Domat è vegnida refusada da la radunanza communala da Favugn l'onn 2020. La radunanza communala è lura sa decidida per la varianta d'autonomia. Quest conclus è ussa d'examinar anc ina giada.
Approvà preventiv che quinta cun perdita
Ultra da quai ha la radunanza communala approvà il preventiv 2024 che quinta cun ina perdita d'in mez milliun francs tar expensas totalas da 13,8 milliuns francs ed entradas da 13,2 milliuns francs.
Ins quinta cun investiziuns nettas da passa 1,6 milliuns francs. 1 milliun francs saja per l'engrondiment dal local da scola. Quest import sto dentant anc vegnir approvà en il rom d'in concept general. Plinavant resta il pe da taglia communal tar 95% da la taglia chantunala simpla.
La radunanza communala ha approvà divers credits:
- sanaziun da la Neugüterstrasse per 188’500 francs
- credit da planisaziun da 250’000 francs per l’elavuraziun d'in project per la construcziun d’ina nova scolina. La radunanza communala ha dentant extendì l’incumbensa da planisaziun. La suprastanza communala è vegnida incumbensada d’examinar supplementarmain ina varianta cun ina halla da gimnastica tripla cun ina halla polivalenta integrada ed in engrondiment da la stanza da scola. L'aula actuala vegniss libra cun questa varianta per l'engrondiment da la scolina e/u da la stanza da scola.
- Sanaziun da la via d’alp Tambo per 610’000 francs
- Surlavuraziun dal plan general da drenascha per 130’000 francs
