Siglir tar il cuntegn

Header

cuntegn

FHGR Perscrutaziun cun pista da carrera

En il rom d'ina lavur da project han students da «Photonics» da la FHGR fatg perscrutaziuns cun ina pista da Carrera.

L'incumbensa per ils 5 students da «Photonics» a la FHGR: programmar e bajegiar enturn ina pista da Carrera uschia, che l'auto vegn manischà dal computer e betg pli cun il maun. Ina camera identifitgescha l'auto sin la pista ed il program da computer regulescha il tempo uschia, che l'auto po ir las rundas il pli spert pussaivel senza dar giu da la pista. En il rom dad ina pitschna concurrenza cun ils autos èn ils resultats finals vegnids testads e cumparegliads.  

audio
FHGR fa perscrutaziun cun autos da carrera
ord Actualitad dals 12.01.2024. Maletg: RTR
laschar ir. Durada: 3 minutas 14 Secundas.

Tge è «photonics»?

Avrir la box Serrar la box

«Photonics» èn products basads sin glisch; tut quai che ha da far cun cameras, elavuraziun dal maletg u laser èn products ch'èn basads sin «photonics».

In exempel dal mintgadi è il smartphone ch'enconuscha la fatga cun l'uschenumnada «Face-ID», che po mesirar cun sensurs la distanza tranter persunas per optimar fotografias. Er ils assistents en vehichels funcziuneschan cun sensurs che tutgan tar ils «photonics» ubain sensurs per portas che s'avran automaticamain tutgan en quella categoria.

La raschun da far perscrutaziuns cun ina pista da carrera n‘è dentant betg il divertiment, mabain in project da perscrutaziun da la FHGR en collavuraziun cun la fatschenta eSave AG cun sez a Cuira. La finamira: chattar ora sco ch'ins pudess far pli intelligent l'illuminaziun da las vias intelligenta ch'i dat gia, cun agid da sensurs che identifitgeschan differents objects sco per exempel autos, peduns u velos e registreschan la spertezza dals objects. Ed er ina surveglianza intelligenta dal traffic è en mira; per exempel per detectar spazi da parcar liber. Il project per ils students saja simplifitgà e perquai hajan els simulà la situaziun cun agid d'ina pista da carrera di Tobias Leutenegger, il manader dal studi «Photonics» da la FHGR.

RTR actualitad 07:00

Artitgels legids il pli savens