Siglir tar il cuntegn

Header

cuntegn

Fin a 5’000 schuldads L’armada sa prepara per proteger il WEF a Tavau

Las lavurs da l’armada svizra per proteger l’inscunter dal Forum mundial d’economia a Tavau han cumenzà. La pli gronda part dals fin a 5’000 schuldads han cumenzà lur servetsch. Il WEF è dals 15 fin ils 19 da schaner.

Da la schuldada che stat en acziun sa chatta ina part en la regiun da Tavau. Per incumbensas sco la controlla dal spazi d’aria, la logistica ed il sustegn da la direcziun lavuran schuldads dentant er en autras parts da la Svizra, communitgescha il Departament federal da defensiun.

Responsablas per ils servetschs da l’armada èn las autoritads dal chantun Grischun. Ils daners necessaris da 2,55 milliuns francs ha il parlament federal approvà. Quai è pli pauc ch’anc avant in pèr onns, perquai che la fundaziun dal WEF surpiglia dapli dals custs.

Limità il diever dal spazi d’aria

Ils 12 da schaner durant pliras uras, e dals 13 fin ils 20 da schaner valan restricziuns per il spazi d’aria sur Tavau. Sin eroports regiunals e heliports valan reglas spezialas, e sgols basegnan ina lubientscha.

Il WEF procura era per dapli traffic sin l’eroport a Turitg, damai che blers dals giasts vegnan ad arrivar cun aviun. L’eroport quinta cun radund 1’000 moviments da sgol supplementars, circa tuttina blers sco ils onns passads. Cun tut ils aviuns spezials ed exotics ch’arrivan, porscha l’eroport als fans da l’aviatica dapli temps d’avertura per la terrassa d’aspectaturs en il terminal B ed in gir spezial.

audio
Per tadlar curt e cumpact
ord RTR Audio dals 08.01.2024.
laschar ir. Durada: 1 minuta.

RTR novitads 12:00

Artitgels legids il pli savens