Tgi che tschertga sustegn po ussa duvrar il register online «find help» en pli che 20 linguas. Nov è che tut las trais linguas chantunalas èn disponiblas. Uschia chattan persunas pli simpel offertas adattadas en ils champs da sanadad e dal social – tranter auter er persunas che discurran pauc u nagin tudestg. Durant ils davos 12 mais han circa 95’000 persunas duvrà l’offerta, inclus il portal central.
«Find help» gida a persunas da chattar svelt e senza difficultads offertas d’agid e da sustegn ch’èn adattadas a lur situaziun. L’utilisaziun è gratuita ed anonima. Sin la plattafurma datti offertas per temas sco sanadad psichica, famiglia, dependenza, difficultads finanzialas u crisas persunalas. La plattafurma è vegnida sviluppada dal Forum Svizra orientala per sanadad psichica. L'Uffizi da promoziun da sanadad e l’Uffizi social chantunal han realisà «find help» communablamain en il chantun.
Offertas leger e filtrar en la lingua materna
Cun l’extensiun tecnica vegnan l’interfatscha d’utilisaziun sco era las descripziuns d'offertas translatadas automaticamain en la lingua tschernida. La lingua s’adattescha automaticamain als parameters dal navigatur d’internet, ma ins sa midar la lingua da tut temp. Datas da contact ed indicaziuns davart las instituziuns restan en la lingua originala.
Pratic per la tschertga: ussa ves’ins a prima vista en tge linguas che ina offerta vegn purschida e sche persunas che translateschan èn disponiblas. Cun la tschertga integrada tenor lieu vegnan mussadas mo quellas offertas che stattan a disposiziun en la regiun respectiva. Igl è sufficient d’endatar il code postal.
Ina plattafurma communabla per chantun e regiuns
Cun la plurilinguitad na vegnan naginas novas offertas creadas, mabain las prestaziuns existentas daventan pli accessiblas. Gist en situaziuns difficilas gida l’orientaziun en l’atgna lingua a chattar pli svelt il dretg sustegn.
Ils chantuns e las regiuns participantas dovran tuttas la medema plattafurma tecnica. Uschia pon offertas vegnir registradas ina giada e vegnir messas a disposiziun a pliras regiuns. Er las translaziuns vegnan fatgas automaticamain e na ston betg vegnir mantunidas separadamain.
