Disturbis psichics en connex cun la lavur custan a l'economia svizra mintg'onn bunamain 20 milliardas francs. Malgrà che las perditas pervia da las malsognas psichicas creschan a moda explosiva e malgrà che interpresas porschan adina dapli scolaziuns da prevenziun, è il tema anc adina tabu.
Stress cronic, burnout u depressiuns: La sanadad psichica a la lavur è daventada in tema impurtant en Svizra. Tenor las pli novas stimaziuns custan disturbis psichics a l'economia dal pajais mintg'onn var 20 milliardas francs, ina cifra che mussa l'augment cuntinuant da las perditas chaschunadas da las malsognas pervia da suffrientschas psichicas.
La Svizra, a la testa dal malesser professiunal
In studi internaziunal da l'Axa mussa che la Svizra è il pajais industrial en il qual l'activitad professiunala ha il pli grond effect sin il bainstar psichic. Bunamain 17% da las lavurantas e dals lavurants èn temporarmain incapabels da lavurar per motivs psichics. Quai è savens d'attribuir a memia blera lavur, termins memia stretgs u a la mancanza da renconuschientscha - ed i pertutga tut las branschas.
Conflicts sco motiv principal
Las tensiuns a la plazza da lavur èn tenor in studi actual cun 57 % la raschun principala per annunzias d'ina malsogna chaschunada psichicamain. Là datti las pli lungas absenzas: en media 218 dis – pia dapli che set mais – ed en 95 % dals cas sa tracti d'ina annunzia d'ina malsogna a temp cumplain.
En vista a quai investeschan adina dapli interpresas svizras en mesiras da prevenziun: lavuratoris per il management da stress, scolaziuns davart ristgas psicosocialas u programs da sustegn psicologic. Malgrà questas stentas resta la sanadad psichica in tema sensibel - in tabu en il conturn professiunal.