La vischnanca da Susch en Engiadina Bassa è ina fracziun da Zernez cun var 200 abitantas ed abitantas. Dapi 15 onns è il lieu daventà in lieu da sanadad e cura. Quai causa la Clinica Holistica, l’unica Clinica spezialisada sin malsognas da stress sco burnout ch’i dat en Svizra. Fundà la Clinica Holistica ha l’affarist indigen Mattias Bulfoni. El haja tratg tras l’idea malgrà intginas reacziuns criticas en vischnanca.
Tuts eran cunter mias ideas. Ma jau era adina persvadì cumplainamain da quest’idea!
L'onn 2018 ha Mattias Bulfoni dà giu ses uffizis en connex cun la Clinica Holistica. Dapi là e la Clinica part da la «Senevita Gruppe».
Istorgia da success
La Clinica Holistica è creschida cuntinuadamain durant ils onns. Cumenzà cun 20 impiegads e 10 pazients ha la gestiun oz 5 edifizis a Susch, capacitads per 60 pazients e cun var 100 collavuraturs è la Clinica Holistica daventada in patrun da lavur impurtant.
Terapias per corp ed olma
En tut porscha la Clinica Holistica 25 differentas furmas da terapia. Sper las psicoterapias classicas èn vegnidas sviluppadas differentas terapias corporalas, sco la terapia d’art u ina terapia da rampignar. Questas terapias laschan sentir danovamain il corp ed ils cunfins.
Per regla èn ils pazients staziunads var sis emnas a Susch nua ch’els duain emprender co ir enturn en situaziuns da stress e survegnir ina basa per pudair turnar en in mintgadi equilibrà.