Tuts trais sajan fortunads ed era loschs sin sasez ch’els han uss en maun il diplom da la matura. I saja numnadamain era stà in temp intensiv durant ils examens finals. Sienna Lutz da Domat sa regorda ch’ella ha sezza sa fatg squitsch. Era Manuel Pelican da Lumbrein è cuntent ch’el na sto betg pli ponderar tge notas ch’el sto far per dumagnar.
Avant ch’els èn vegnids a la Scola chantunala han Sienna Lutz e Manuel Pelican udì che quests onns daventian pretensius. Quai na saja dentant betg stà il cas. Els dus han avant fatg la scola secundara – e sch’els congualan quella cun la Kanti, saja quai stà sumegliant. Flavia Lanfranchi da Cuira aveva udì insatge en in tut auter connex: ch’ins sa disia a questas lungas stgalas per arrivar tar la Kanti. Ella di cun in rir, che quai saja enfin la fin stà stentus.
Tuts trais n'han durant lur temp en il gimnasi dentant mai gì il sentiment ch’els vulan bittar nà tut. Era sch'ir a scola n'è betg la chaussa preferida da Manuel Pelican. Era Flavia Lanfranchi è cuntenta che quai è uss a fin. Tuts trais din che la classa vegn a mancar ad els, surtut pervia da la glieud.
Gimnasi sco dretga decisiun
Cun recapitular quests onns sa decidessan tuts puspè per la Kanti e betg per in emprendissadi. Sienna Lutz ha numnadamain durant la Kanti chattà tge ch’ella vul far en l'avegnir. Quai tras las lecziuns da psicologia – quai va ella a partir da settember a studegiar a Turitg, vitiers anc rumantsch. Per Flavia Lanfranchi saja quai adina stà cler ch’ella vul far il gimnasi e suenter studegiar cun quai ch’ella saja schon adina stada ina buna scolara. Avant intgins onns avess Manuel Pelican en sasez vulì far in emprendissadi sco informaticher. Questa plazza n'ha el dentant betg survegnì ed ha alura fatg ses plan B – ir al gimnasi. Uss è el cuntent ch’el ha fatg quai.
Sco vinavant?
Manuel Pelican sto sco emprim ir en il servetsch militar. Suenter sto el anc far in plan concret, sch’el vul ir a studegiar u far in praticum. Tar Flavia Lanfranchi dependi sch’ella dumogna l’examen da numerus clausus per ir a studegiar medischina. Sche quai n'avess betg da grategiar, va ella a la ETH a Turitg a studegiar scienzas da sanadad e tecnologia. Sco menziunà va Sienna Lutz il settember a Turitg a studegiar psicologia e rumantsch. Enfin là sto ella anc organisar in'abitaziun. Tut en tut s’allegran els sin il futur, era sch’els vesan intginas chaussas anc sco sfidas.