Sin iniziativa privata è l'emprim «Forum d'energia grischun» vegnì mess en pe ed ha gì lieu il glindesdi a Cuira. Referì han differents experts da la scena – uschia tranter auter era Anton Gunzinger. L'interprendider pensiunà ed anteriur professer a l'ETH a Turitg vala sco corifea sch'i va per dumondas davart la midada sin energias regenerablas. Il motto da l'occurrenza «Far è sco vulair – mo pli crass» è in motto che Anton Gunzinger na vesa betg en la Svizra sch'i va per far avunda spert la midada sin energias regenerablas. En las testas da las Svizras ed ils Svizzers regian anc adina cifras dad avant 20 onns en connex cun l'effizienza ed ils custs da las differentas energias. Perquai na saja la Svizra betg uschè lunsch sco ch'ella avess il potenzial dad esser.
Sch'ins dumonda davart il status quo en il Grischun e la dumonda sche almain il Grischun nizzegia ses potenzial, na po Anton Gunzinger er betg dar bler meglras notas. Ma il Grischun è vidlonder. Uschia ha la vischnanca da Scuol preschentà gist l'emna passada ses plans da construir il pli grond parc solar en Svizra e quai en il cas ideal gia en ils proxims trais onns. Tals plans en in tal tempo possia Anton Gunzinger mo beneventar. Ses motto è ch'i na possia gnanc ir spert avunda.
