Ils davos dus onns ha l'Ospital chantunal da Cuira furnì 400 fin 500 tschaveras per il di a las canortas da la scola da la citad da Cuira. Uss ha l'ospital dentant decidì da betg pli surprender quest pensum.
Da mangiar chaud sco punct decisiv
In dals motivs saja tenor il pledader da medias da l'Ospital chantunal Dajan Roman ch'il process en cuschina vegnia interrut e che las capacitads manchian. Latiers saja in dals motivs che las canortas han il giavisch che las tschaveras arrivan chaud al lieu. Quai saja grev da realisar per l'ospital. Las canortas privatas surpiglia l'ospital dentant vinavant, cunquai che là na saja betg in problem sch'il da mangiar n'arrivia betg chaud en las canortas. Dapi che l'Ospital chantunal ha surpiglià il pensum è il dumber da tschaveras creschì constantamain.
Tschertga da nov furnitur
En ina publicaziun tschertga la scola da la citad uss in nov furnitur per las canortas. Quai a partir dal cumenzament da fanadur. Per la scola da la citad, uschia la manadra da scola Ursina Patt envers il schurnal regiunal dad SRF, saja vinavant impurtant ch'il da mangiar arriva chaud. A las total 16 canortas manca l'infrastuctura da stgaudar il da mangiar. Plinavant èsi er impurtant a la scola da la citad ch'i dettia er menus vegetars e da nua che las mangiativas derivan tar il furnitur.
