La raschun per questas ponderaziuns saja l’avegnir difficil per vischnancas cun damain che 1’000 abitantas e abitants. Quai scriva la «Aroser Zeitung». Bain saja la situaziun anc buna cun finanzas equilibradas e la scolina e la scola che sajan anc qua, hai num da vart da la vischnanca. En intgins onns vegnia dentant a vesair ora different, cun damain abitants ed abitantas ed uschia era damain entradas da taglia.
Ils discurs fatgs cun las vischnancas vischinas Arosa e Churwalden hajan mussà, che Cuira saja la meglra varianta. Tschiertschen-Praden saja adina stà orientà vers la chapitala, hai num. Sco proxim pass vul la vischnanca ussa instradar las tractativas per la fusiun cun Cuira. Sche tut va tenor plan pudess la fusiun esser sut tetg il 1 da schaner dal 2024.
