Ils 6 fin ils 22 da favrer 2026 han lieu ils gieus olimpics d’enviern en l'Italia – tranter auter era a Livigno e Bormio. Bleras persunas che vulan ir a quest event vegnan a passar il Grischun, tge che vegn a manar tar dapli traffic. Tenor ils organisaturs vegnan spetgadas circa 12’000 persunas a Livigno. Quests giasts sa cumuleschan cun quests da la stagiun d’enviern en Grischun.
Il concept da traffic per quest event na saja tenor la regenza anc betg finalisà, Livigno duai dentant mo esser cuntanschibel cun il traffic public – sur Zernez, il Tirol dal Sid u la Val Müstair. La regenza fa quint che blers giasts vegnan era dal Nord, pia sur Landquart. Las consequenzas dal traffic sin las colonnas en Partenz e la Val dal Rain vegnan anc examinadas.
Ils custs per il management da traffic enturn Livigno durant ils gieus olimpics importan 5,5 milliuns francs – da quai surpiglia l’Italia entant cnap 600’000 francs. In fatg ch'agita la deputada da la partida verda Anita Mazzetta.
Quai èn ils gieus da l'Italia e betg noss. Nus schliain in problem che els chaschunan, pia duain els pajar almain la mesadad da quests custs perquai che Livigno profitescha er da quest concept da traffic.
L'Italia saja dentant actualmain fitg pauc cooperativa, sco la cussegliera guvernativa Carmelia Maissen ha declerà en la sessiun dal Cussegl grond. I saja fitg difficil da survegnir ina contribuziun finanziala vi dals custs dal concept. Sco la cussegliera guvernativa Carmelia Maissen di, hajan ins furnì tut las infurmaziuns e mussà il concept da traffic a l'Italia cun la spetga che l'Italia sa participescha als custs.
Igl è deplorabel che nus n'avain fin ussa anc betg survegnì ina resposta definitiva.
Per survegnir dapli sustegn, per far squitsch sin l'Italia, saja la regenza pronta dad ir fin giu Berna, uschia ha ditg Carmelia Maissen. Il glindesdi proxim è previs a Zernez in inscunter cun tut las instanzas involvadas per infurmar en detagl davart il concept da traffic en connex cun ils gieus olimpics a Livigno.
Grischun sa prepara sin fulla da visitadras e visitaders
Ils 25avels gieus olimpics d'enviern han lieu dals 6 fin ils 22 da favrer 2026 a Milano-Cortina en l'Italia. Questa occurrenza vegn probablamain a carmalar in grond dumber da visitadras e visitaders. Dus dals lieus d'occurrenza, Livigno e Bormio, èn cuntanschibels per bleras visitadras e per blers visitaders il meglier sur il chantun Grischun en Svizra.
La finamira dal concept è quella da carmalar las visitadras ed ils visitaders uschè baud sco pussaivel sin il traffic public.
Il traffic da visitadras e da visitaders spetgads è confruntà cun grondas sfidas en vista la planisaziun dal traffic per il chantun Grischun. Per dumagnar quellas ha ina gruppa da lavur chantunala elavurà in concept per diriger il traffic. Quest concept è vegnì approvà da la regenza dal chantun sco ch'igl era scrit en la communicaziun a las medias.
Las sfidas dal traffic per il Grischun
Ina part da las concurrenzas ha lieu a Livigno ed a Bormio (Italia dal Nord). Livigno è ina sfida per il Grischun areguard il traffic, perquai ch'i vegn spetgà fin a 12'000 visitadras e visitaders durant dis da grond'impurtanza – circa in terz arriva sur la Svizra. Ina gruppa da lavur chantunala ha elavurà in concept da traffic per garantir la direcziun dal traffic durant la stagiun auta turistica. La finamira è in andament senza incaps en l'interess da la populaziun e da l'economia.
Il concept en survista
Ina gronda part da las aspectaturas e dals aspectaturs da l'Europa dal Nord e da l'ost vegnan a viagiar sur il Pass dal Fuorn ed il tunnel d'in vial Munt La Schera vers Livigno. Il tunnel vala gia oz sut cundiziuns normalas sco stretga e reagescha a moda sensibla sin dapli traffic.
Perquai è la finamira dal concept d'attrair las visitadras ed ils visitaders uschè baud sco pussaivel sin il traffic public. Per transportar durant in curt temp uschè bleras persunas sco pussaivel tras il tunnel Munt La Schera vegnan mess en funcziun bus da shuttle. Il passadi per vehichels privats duai esser pussaivel durant tschertas periodas e per in circul restrenschì da persunas.
Ulteriur proceder e finanziaziun
Suenter l'approvaziun dal concept da traffic cumenza la gruppa chantunala da lavur cun la planisaziun detagliada e cun la realisaziun. Latiers tutgan l'elavuraziun e la surdada dal contract sco er las preparativas architectonicas per ils implants da P+R. Il december ha lieu a Zernez in'occurrenza d'infurmaziun publica per las vischnancas pertutgadas e per ils circuls interessads dal Partenz, da l'Engiadina e da las valladas dal sid.
Ils custs totals per il management da traffic ed il dispositiv da segirezza muntan probablamain a var 5,5 milliuns francs, da quai èn var 4,6 milliuns francs custs externs. Questa summa è la varianta maximala.
Ina contribuziun finanziala da l'Italia è empermessa. Sche questa contribuziun na cuvra betg ils custs, vegn cuvrì l'import restant sur las taxas per l'utilisaziun da bus P+R e da shuttle tras ils giasts.