L'onn 2038 pudess quai dar gieus olimpics en l'entira Svizra. Avant curt è la consultaziun ida a fin, tant il Cussegl federal sco er ils chantuns beneventan gieus olimpics en Svizra. L'uniun Switzerland 38 planisescha da far gieus decentrals cun eveniments da sport en l'entir pajais. Per il Grischun prevesa il concept occurrenzas da sport a San Murezzan e Lai.
A San Murezzan/Schlarigna avessan lieu las occurenzas da Bob. A San Murezzan/Silvaplauna las occurenzas da freestyle. A Lantsch/Lai avessan lieu las occurenzas da biatlon. Omaduas destinaziuns han gia blera experientscha cun occurrenzas grondas.
Survista dals lieus ospitants en Svizra
L'euforia a San Murezzan ed a Vaz para gronda. Tant tar ils presidents communals sco era tar las persunas che nus avain dumandà sin via. Maurin Malär, il president communal da Vaz, vesa il grond potenzial da la destinaziun Lai cun l'arena da biatlon.
Nus essan l'unica destinaziun cun in'arena da biatlon en quella dimensiun. Nus fissan predestinads per gieus olimpics.
San Murezzan ha grondas experientschas cun gieus olimpics. L'onn 1928 e l'onn 1948 han gì lieu ils unics gieus olimpics dal Grischun. Cun l'infrastructura per bob e skeleton e cun l'organisaziun dals campiunadis mundials da freestyle, hajan els gronda rutina.
Nus essan anc oz superbis da noss ultims gieus olimpics. Quai fiss ina schanza per nossa generaziun.
Probabel vegn l'IOC a decider l'onn 2027 davart la candidatura. Tar ina decisiun a favur da la Svizra, decidessan las vischnancas ospitantas davart ils credits. Ed alura pudess la flomma olimpica suenter 90 onns puspè turnar en ils culms grischuns.