L’American Eric Wasserman è tut intgantà dal viadi cun l’auto da posta sin la via dal Pass dal Furn. El vegn da Mammoth Mountain, in lieu turistic en la California. El sa legra d’ir a guardar tschintg atletas ed atlets da sia citad a Livigno, nua che las concurrenzas da freestyle dals Gieus olimpics 2026 han lieu. Sco Chloe Kim che gudogna in pèr dis pli tard argient cun il snowboard en la half pipe.
Durant ses viadi a Livigno ha Claudio Spescha entupà blers turists ch’èn ids tras il Grischun als gieus olimpics, ina gronda part da lingua englaisa – dals Stadis Unids, dal Canada u da la Gronda Britannia.
Guardar gieus olimpics a Livigno ed ir cun skis en il Grischun
Entant che Eric Wasserman fa gist in’emna vacanzas a Livigno, turnan auters suenter la visita als gieus olimpics per durmir en il Grischun. Sco duas soras da Toronto el Canada che Claudio Spescha ha entupà a Livigno e che van suenter anc in pèr dis cun skis a Scuol.
-
Bild 1 von 3. Eric Wasserman da Mammoth Mountain en California. Bildquelle: RTR.
-
Bild 2 von 3. Turistas dal Canada che van als Gieus olimpics a Livigno. Bildquelle: RTR.
-
Bild 3 von 3. Turists englais che fan duas emnas vacanzas a Livigno per 16'000 euros. Bildquelle: RTR.
Tanschi per esser ad uras a Livigno e far in bogn en l’atmosfera olimpica – u datti in caos da traffic sin las vias grischunas? Quai è stad la dumonda da Claudio Spescha la damaun da l’emprim di dals gieus olimpics, sonda, ils 7 da favrer.
Tenor il concept da traffic dal chantun Grischun han ins stuì quintar cun fin 4’000 visitadras e visitaders supplementars al traffic normal da la stagiun auta. Il chantun Grischun ha mess en pe aposta in concept per 5,5 milliuns francs, per transportar il publicum che vul ir a Livigno ed enavos – Livigno che è l’enviern accessibel be tras il tunnel da Munt la Schera ch'ha unicamain in vial.
Il concept da traffic para da funcziunar bain
Mess ad ir han ins: quatter areals da parc & ride cun tut il personal necessari, curs supplementars da la Viafier retica tras il tunnel dal Vereina, ina colliaziun spessa d’autos da posta tranter Zernez e Müstair a Livigno – che basegna 30 manischunzs supplementars, per part d’auters chantuns. Quai sin basa da cifras ch’il chantun Grischun ha survegnì da l’Italia.
L’emprima sonda dals gieus olimpics ha quai funcziunà fitg bain. Tant tras il tunnel dal Vereina sco era cun il shuttle da l’auto da posta davent da Zernez.
-
Bild 1 von 5. Cun Simon Rohner, responsabel dal transport d'autos tras il Vereina. Bildquelle: RTR.
-
Bild 2 von 5. Il bus per ir als Gieus olimpics a Livigno. Bildquelle: RTR.
-
Bild 3 von 5. L'autur dal film, Claudio Spescha, da viadi en l'auto da posta. Bildquelle: RTR.
-
Bild 4 von 5. L'areal da park & ride a Zernez è quasi vid. Bildquelle: RTR.
-
Bild 5 von 5. En il tunnel Munt la Schera vers Livigno. Bildquelle: RTR.
Ils blers èn viagiads cun transports publics a Livigno. Ins è vegnì senza problem, senza stress e senza spetgar ditg a Livigno. Ma ils plazs da park & ride èn stads quasi vids. Uschia ch’ins sa dumonda: È il concept da 5,5 milliuns francs stravagà?
Tge ha il Grischun da quai?
Tge portan quels gieus olimpics al Grischun, auter che traffic e custs per manischar quel – e senza avair la garanzia che l’Italia sa participescha lura propi vi da quels custs?
Ed insumma: n’èn gieus olimpics fin uss betg stads per regla ina show bombastica, cun in lung barbagiat da custs starmentus per ils pajataglias ed ina massa indrizs ch’èn daventads ruinas?
In test per gieus olimpics en Svizra?
L’Italia ha vulì impedir quai questa giada cun far gieus decentrals en plir lieus – insatge che la Svizra vul forsa era far l’onn 2038. Perquai èn ils gieus olimpics 2026 a Livigno, Milaun, Cortina ed auters lieus era in test per la Svizra.
Ma funcziuna quai propi – senza ruinas e custs stravagads par il maun public? Era quai fatschenta Claudio Spescha sin ses viadi a Livigno. Perquai discurra el era cun Gian Gilli che è stà il directur da la candidatura per gieus olimpics en il Grischun 2022.