Che Gieus olimpics èn dispitaivels causa la persistenza, fitg grondas investiziuns u auts custs da mantegniment che suondan è enconuschent.
Quai n'è betg auter tar ils gieus olimpics 2026 a Milano-Cortina, pretendan publicamain Sevio Peri e Carlotto Bormolini da Livigno. En in’anteriura pizzeria amez il vitg da Livigno han els installà in’exposiziun che fa attent sin plirs puncts critics dals gieus che han lieu era a Livigno.
Avant plirs dis hai dà ina perquisiziun da l’exposiziun e da l’abitaziun da Carlotto Bormolini entras plirs policists. Ils policists han chattà in schluppet fitg vegl. Sin quai è vegnì arrestà Carlotto Bormolini. Avant dus dis è el vegnì manà avant tribunal a Sondrio. La sentenzia n'è anc betg enconuschenta.
Sevio Peri, il soci da Carletto Bormolini di envers RTR che Carlotto Bormolini haja survegnì in scumond da discurrer cun la pressa e stoppia adina puspè sa mussar tar la polizia en la Valtelina. Sevio Peri menziuna era che quest schluppet è in fitg vegl schluppet che Carlotto Bormolini ha ertà e ch'era anc dal non.
Infurmaziuns concretas mancan
Da vart uffiziala na sa lascha betg verifitgar l’istorgia causa che quai è anc in cas pendent.
Tenor Savio Peri saja tut quest be schicanas pervi da lur critica averta envers il sistem ed ils gieus olimpics. El na sa laschia betg far tema e cuntinuescha cun sia protesta.
En il vitg è la critica fitg quieta, ma preschenta. Nagin na vul dar intervistas ma blers raquintan en confidenza che Savio e Carletto hajan raschun ma ch'els sezs na ristgian betg da far opposiziun.
Tge che stat propi davos la perquisiziun e la tgisa encunter Carletto Bormolino è per il mument grev da dir ed igl è da spetgar sin ina communicaziun uffiziala da la polizia u dal tribunal talian.