Il sport è la vita da Gian Gilli da Bever. Gia dad uffant era el passiunà per il sport da hockey, pervia da sia passiun è el sgulà dal Lyceum Alpinum. La matura ha el lura fatg a Friburg, ed il studi da magister da sport a Berna.
Durant sia entira vita è el s'engaschà per il sport. El era magister da sport, trenader da passlung, schef de mission da Swiss Olimpic tar divers gieus olimpics, schef dals campiunadis mundials da skis l’onn 2003 a San Murezzan ed organisatur dals campiunadis mundials da hockey l’onn 2009 a Berna e Kloten.
Gian Gilli è dentant era stà «Mister olimpia». El era durant la campagna da votaziun promotur per gieus olimpics il 2022 en il Grischun.
La promoziun per gieus olimpics en Grischun era per mai in dals pli bels projects.
Gian Gilli sin l'Alp Timun en la Val Lavirun
-
Bild 1 von 3. Riet Planta (sanester) e Gian Gilli fan era musica ensemen. Bildquelle: RTR.
-
Bild 2 von 3. Ils pasters da l'Alp Timun, Gian Gilli e Riet Planta. Bildquelle: RTR.
-
Bild 3 von 3. Gian Gilli al pè dal massiv dal Bernina. Bildquelle: RTR.
Ultim grond project ch’è vegnì annullà ha midà la vita
Er il 2020 era Gian Gilli puspè il directur dal campiunadi mundial da hockey en Svizra a Turitg e Losanna. El e ses team avevan lavurà quatter onns per questa occurrenza gronda e pir in pèr dis avant l’emprima partida ha el stuì ceder. La pandemia da corona ha tratg la spina da forza al campiunadi mundial. La pandemia ha fatg ina fin a tut las occurrenzas grondas, a tut ils eveniments cun blera glieud. Corona aveva tutgà fermamain l’economia e la societad. Quasi tut il mund era pertutgà.
La pandemia ha procurà per in tagl radical en la vita da Gian Gilli. En quella fasa da la vita ha el fatg las dumondas principalas. Tge dess jau anc far cun mia vita? In inscunter sin loipa cun in ami era decisiv. Quel era gia stà sin alp e duvrava in nov paster. Uschia ha el dumandà Gian Gilli sch’el vul far quella lavur durant ils mais da la stad. Il manager da sport ha durmì ina notg sur la proposta ed ha respundì: «Gea! Jau vegn cun tai ad alp.» Oz di Gian Gilli che quella decisiun era ina da las meglras en sia vita.
Suenter 40 onns ch’el è s'engaschà per il sport ha el decidì dad ir ad alp. Gian Gilli ha laschà la vita hectica e plain stress suenter sai ed ha chattà ina nova satisfacziun amez ina scossa da vatgas sin l’alp Timun sur La Punt.