Giubileum per guaud magic - 10 onns Zauberwald Lenzerheide

Tranter mitad december ed il cumenzament da schaner sa transfurma il guaud da stgilats tranter Lai e Valbella en in festival da musica ed in'exposiziun d'art. En tut han pudì admirar quest enviern 17 exponats, 17 concerts per uffants, 17 acts musicals e 17 concerts classics en ina atmosfera tut speziala.

audio

Bilantscha cun manadra Marina Morgenthaler

04:12 min, ord Actualitad dals 30.12.2023. Maletg: Keystone

laschar ir. Durada: 4 minutas 12 Secundas.

Ils differents exponats d'art da glisch vegnan da differentas artistas e da differents artists da l'entir mund, dentant er da persunas indigenas, per exempel da las scolaras e dals scolars da las scolas da Vaz e da Panaduz. Els èn repartids sin il gir tras l'entir guaud.

1 / 10

2 / 10

3 / 10

4 / 10

5 / 10

6 / 10

7 / 10

8 / 10

9 / 10

10 / 10

Musica per tut las generaziuns

Ultra da l'art da glisch datti er per las ureglias in program varià per tut las gruppas da vegliadetgna. Sin il palc principal datti sper concerts per uffants p.ex. da Linard Bardill, Andrew Bond u Singvögel er concerts da Musica actuala sco Bligg, Tim Bendzko, Breitbild o Pegasus. Ils tuns pli calms datti al «Classic-Corner» cun chant classic, arpa, percussiun d'orchester e clavazin.

L'entira occurrenza vegn accumpagnada da differentas purschidas culinaricas als divers stans da vendita.

L'aspect da persistenza

Per il Zauberwald Lenzerheide vegn retratg electricitad natirala indigena. L'occurrenza retira l'electricitad d'ina ovra electrica pitschna che ha ina colliaziun directa cun il guaud magic da Lai. Il Heidbach che serva a la producziun d'electricitad va tras il guaud magic. Las installaziuns da glisch e la tecnica da tribuna funcziunan per sur 80% cun LED, quai che maina ad in diever d'electricitad pli pitschen. Las installaziuns da glisch vegnan curatadas principalmain cun ovras reutilisablas ch'èn vegnidas arranschadas da nov.

Concept da success

Entant che l'emprima ediziun dal 2013 è vegnida visitada da var 10'000 giasts, èn quai en il fratemp var 40'000. Ils organisaturs na vesan però nagin motiv per engrondir vinavant l'event. Il plaz che stat a disposiziun en il guaud saja la finala limità. Perquai datti per la saira er mo in dumber limità da bigliets. Il budget total per la ediziun 2023/24 importa circa 1,8 milliuns francs.