La radunanza generala da sonda passada avess pudì avair ina mala fin – ins n’ha betg fat quint cun novas commembras e commembers da la suprastanza – ed alura fiss vegnida schliada l’uniun da la Giuventetgna Rumantscha.
La saira hai dentant dà ina gronda surpraisa: Tut las tschintg plazzas da la suprastanza han pudì vegnir occupadas.
Nus n’avain spetgà nagut – nus avain pensà ch'i savess esser ina da las davosas radunanzas da la GiuRu.
Radund 15 persunas han prendì part a la radunanza generala. Pliras persunas èn vegnidas da nov en l'uniun. Er gnanc tuts da la nova suprastanza n’eran avant anc commembers da la GiuRu. Ina ulteriura surpraisa è stada, che tuts da la nova suprastanza èn oriundamain da l’Engiadina Bassa, quai è dentant plitost ina casualitad. En futur giavischan els ch'i dettia ina maschaida tranter las differentas regiuns rumantschas, dentant èn uss tuts cuntents ch'i èn insumma vegnids ensemen cun ina nova suprastanza.
Sco nov president da la GiuRu è vegnì elegì Lucas Kirchen. Il giuven da Zernez ha 26 onns e studegia biochemia a l’Universitad da Turitg.
La finamira è da dar a la GiuRu nov schlantsch ed elan e nus vulain empruvar che quest local è en in onn èmemia pitschen per la radunanza generala.
Plans concrets per il futur han els anc nagins. Sco emprim sto la suprastanza emprender d'enconuscher in l'auter, guardar che che la GiuRu ha fat enfin ussa ed alura vegnir cun novas ideas e projects per il futur.
