I resta sulettamain la cassiera Leta Arpagaus e l'assessur Manuel Sonder da la suprastanza da la GiuRu. Els hajan gia prendì differentas mesiras per far reclama e motivar persunas da surpigliar in dals posts vacants. Fin ussa senza success. I saja bain qua interess dad in u l'auter, dentant saja era chapibel ch'ins na veglia betg vegnir nov en in'uniun e gist surprender in post en la suprastanza.
I saja grev da dir tge ch'i duvrass per spendrar la GiuRu, il na dettia nagin masterplan. Ils dus suprastants che restan chattassan fitg donn sch'i na dess nagina GiuRu pli. Uschia emprovan els cun tut lur forzas da mantegnair l'uniun.
En dus empruvain nus cun tutta forza da salvar l'uniun, ma noss'energia sminuescha. Nus ans stentain da chattar persunas ch’èn prontas da s'engaschar en suprastanza e da dar uschia nov schlantsch a l'uniun.
La finamira è clera: occupar ils posts vacants en suprastanza en il rom da la radunanza generala che vegn ad avair lieu il mars da l'onn proxim. En ina brev averta han ils dus suprastants restants da la GiuRu dumandà la Lia Rumantscha e las uniuns affiliadas per agid.
Idea oriunda da la GiuRu
La GiuRu è vegnida fundada en il rom da la scuntrada rumantscha il 1991 a Laax. Ils organisaturs avevan clamà ensemen ils presidents e las presidentas da las uniuns da giuventetgna. L’idea: collavuraziun tranter las differentas regiuns e colliar las differentas valladas rumantschas.
Nus avain pensà che l’idea da collavurar tuna interessant e guardain ina giada tge ch'i pudess dar ordlonder. Plans concrets n'avain nus gì nagins.
Ins haja lura realisà differents projects sco il cudesch da comic «Jo – 17 ed en speranza», brevs a la regenza ubain discussiuns politicas. Ins haja simplamain vulì far attent e sensibilisar per ils basegns da la giuventetgna e dar ina vusch als giuvens e las giuvnas rumantschas. Sch’ins saja giuven possian ins empruvar or e far experientschas ch’ins na possia suenter mai pli far.
Contact cun la Lia Rumantscha
Ils dus suprastants restants Leta Arpagaus e Manuel Sonder èn er en contact cun la Lia Rumantscha per eruir sco ch'i pudess ir vinavant cun la GiuRu. En ina brev averta per la radunanza generala da la Lia Rumantscha avevan ils dus suprastants descrit la situaziun actuala da l'uniun e dumandà la Lia sco era las uniuns affiliadas per agid u inputs tge ch’els pudessan anc far per pudair occupar ils posts vacants da la suprastanza.
Per l'entir moviment rumantsch fissi ina gronda difficultad sche la giuventetgna na fiss betg pli preschenta cun ina uniun, di Andreas Gabriel da la Lia Rumantscha.
Sch'i na dess pli la GiuRu perdess il moviment rumantsch ina da sias fatschas.
In stoppia guardar enavant, tge che sajan eventualas furmas novas. Andreas Gabriel na crai betg che quai saja la fin da la lavur da Giuventetgna Rumantscha.
