Il chantun è obligà da promover la transfurmaziun digitala en il Grischun. Il schaner avant in onn ha il Cussegl grond approvà la lescha correspundenta sco era mess a disposiziun 40 milliuns francs per promover projects digitals. Tgi che vul profitar da quels daners da promoziun dovra l'emprim ina buna idea e sto lura metter ensemen la dumonda. Qua cumenza er la lavur da GRdigital che sustegna fatschentas d'inoltrar ils projects cun tut ils detagls necessaris.
Da la dumonda tar la promoziun
Tgi ch'ha in project digital inoltrescha quel a GRdigital. Silsuenter fa il post d'administraziun da GRdigital in'emprima controlla formala e sclerescha detagls. En in terz pass vegnan expertas ed experts activs che evalueschan sche las dumondas èn degnas da vegnir promovidas u betg. Er la suprastanza da GRdigital ha qua in pled en chapitel. La finala decida la regenza sin basa da l'evaluaziun dal gremi d'expertas ed experts definitivamain davart ils daners da promoziun. Er suenter che la regenza ha concedì ils daners accumpogna GRdigital vinavant ils projects per definir ils proxims pass per realisar il project.
48 dumondas inoltradas – 4 fin uss sut tetg
Enfin uss èn 48 dumondas vegnidas inoltradas tar GRdigital. Per quatter da quellas ha la regenza grischuna gia concedì ils daners da promoziun. Sis dumondas èn il mument en evaluaziun tar il gremi d'expertas ed experts avant che quellas vegnan sin la maisa da la regenza. Numerusas dumondas èn anc a l'entschatta da l'entir process.
Turissem u furmaziun
Las ideas per projects da digitalisaziun vegnan ord las differentas spartas. Sco Marcel Suter, il mainafatschenta da GRdigital, ha declerà, stattan blers en connex cun il turissem u furmaziun. Uschia sa drizza in project ad ina software che duai purtar en il dretg mument ils dretgs products als dretgs giasts. Suenter che questa software è realisada duain tuttas destinaziuns turisticas dal Grischun avair access a questa purschida. In auter project vul realisar ina plattafurma cun scolaziuns online per la branscha da turissem. In ulteriur project è situà en la scola. I va per ina app che curregia ils pensums ch'uffants han scrit a maun.
App da correctura «Herby»
Niklas Frei è in dals chaus davos l'app da correctura Herby. Quella app funcziuna uschia: Sco enfin qua fetschian ils uffants ils pensums a maun. Cun il telefonin u tablet pon ils uffants lura far sez ina sort fotografia dal fegl da lavur e sin il telefonin – en la app «Herby» – vesan ils uffants lura nua ch'els han fatg sbagls. Il medem mument vesa la scolasta u il scolast ils resultats. Uschia possia la magistraglia sa concentrar pli fitg sin la lavur individuala cun ils uffants, di Niklas Frei.
Per crear ina plivalur per il Grischun saja la finamira d'includer tut ils cudeschs da matematica en l'applicaziun, e quai er en ils differents idioms. Qua sajan els anc en tractativas cun l'Uffizi per la scola populara, sco in dals iniziants Niklas Frei ha ditg. Fin che quella lavur saja fatga dovria però bleras uras da lavur. Per quest project digital ha la regenza grischuna concedì 450'000 francs, ils custs totals èn calculads sin 1,4 milliuns francs.
