I plai fitg. Igl è atgnamain uschia sco che jau hai spetgà.
Surpraisas n'haja betg dà, di Daniel Wasescha suenter ils emprims 100 dis en uffizi. Cumenzà sia lavur sco president communal dal Surses ha el gist cun in grond project – «Nandro Solar». Che quai vegnia ad esser l'emprima fatschenta ch'el stoppia u possia surpigliar è stà da prevesair. La fatschenta sco tala saja ida bain.
Cun guardar enavos haja schon dà muments critics, sco per exempel la saira d'infurmaziun per la populaziun. Là saja stà da far attenziun da far nagins sbagls. La votaziun sco tala saja ida bain, ed il resultat è stà cler.
Independent dal resultat da la votaziun, era per mai fitg impurtant che la pasch restia en val.
Sco start fissi stà il mender, sche la fatschenta avess dividì la populaziun, di Daniel Wasescha. E quai vuleva el evitar per tut pretsch. La pasch saja restada en val. Grond tema na saja «Nandro Solar» betg pli en il Surses.
La pli gronda sfida
L'entschatta saja stada fitg intensiva – cun l'introducziun parallel cun la fatschenta «Nandro Solar». Ils dis da lavur sajan stads lungs, ma betg fitg lungs. Insacura na pudev'ins lura er betg pli, e far tut en in di na giaja er betg.
Sco nov president communal na dettia era betg in mais per lavurar parallel. Il president partent saja fin ils 31 da december en uffizi, ed il proxim di saja il nov president vi dal pult. Il nov president communal haja immediat da surpigliar tut, da suttascriver tut. La collavuraziun cun la suprastanza e l'administraziun funcziunia fitg bain.
L'entschatta suttascriv'ins da quai ch'ins ha pauca fin nagina idea. Mo uss crai jau d'avair la survista.
El haja gì differents discurs cun fitg bleras persunas, di Daniel Wasescha. Quai saja normal sch'ins surpiglia uschè in uffizi – el veglia emprender d'enconuscher la glieud, e la glieud veglia emprender d'enconuscher el. Nagin na discurrivia negativ – cun problems na saja nagin arrivà. El sentia propi ina tenuta fitg positiva.
Tuts vulan, tuts èn pronts – igl è ina tenuta fitg positiva. E quai era fitg legraivel da sentir quai uschia.
Quai cuntrari als commentaris ch'el haja survegnì l'entschatta ubain anc avant ch'el saja vegnì elegì – ch'in stoppia avair ina pel dira e tut vegnia tar il mastral. Quai na saja betg stà uschia. Fin ussa n'haja dà nagut che saja stà propi malempernaivel.
Sch'i resta uschia, lura èsi tip top.
