Ina collisiun da termins saja il motiv per spustar a fitg curta vista in termin da dretgira. I va per il cas da l’anteriur derschader administrativ ch’è vegnì declerà culpant en emprima instanza da la dretgira regiunala Plessur, d’avair violà e mulestà il december 2021 ina praticanta. Ch'i na dat actualmain nagina debatta giudiziala ha il Tribunal federal decidì venderdi passà.
Gia il schaner passà ha la defensiun, l’advocata da l’anteriur derschader sentenzià, fatg la dumonda a la Dretgira superiura dal Grischun da spustar il termin dad oz. La dretgira è restada tar il termin dals 17 da mars – sinaquai ha l’advocata tratg la dumonda tar il Tribunal federal, e quel ha decidì ch’il termin sto vegnir spustà.
Sco raschun ha l’advocata numnà ch’ella haja gia in termin per il mardi tar la Procura publica federala. Ins na possia betg esser en dus lieus – ed er na possia betg in auter advocat remplazzar ella en il cas.
Davart la Dretgira superiura dal Grischun na datti nagin commentari pertge ch’ins n’è betg entrà sin la dumonda per in auter termin da la defensiun il schaner, e pertge ch'ins n'ha betg preschentà plirs termins pussaivels a las partidas en il cas. In nov termin n’è anc betg vegnì definì, quai ha Stefan Schmid il responsabel d'infurmaziun da la Dretgira superiura dal Grischun confermà vers RTR.
Critica
En il process il november 2024 ha in derschader per exempel dumandà l’unfrenda, la praticanta, sch’ella n’avess betg pudì sa defender e struclar ensemen pli fitg las chommas per evitar ina violaziun. Quai ha alura dà protests ed ina demonstraziun a Cuira: «il turpetg sto midar vart», è stà scrit per exempel sin ils transparents.
La sentenzia sco tala da 23 mais: Tar 2 onns avess l’anteriur derschader stuì ir en praschun. La procura publica, sco accusadra aveva pretendì 30 mais – da quels 6 mais praschun cundiziunà.
Er ch’igl ha duvrà prest in onn fin che la sentenzia è insumma vegnida argumentada en scrit. Tenor lescha è quai da far en 60 dis, en cas cumplex en 90 dis. Experts da dretg na chapeschan betg, daco che quai è ì uschè ditg. Ed ina part da l’argumentaziun per quella sentenzia da 23 mais è stà ch’i haja dà ina condemnaziun prematura tras las medias, quai na sappi betg esser in argument en quel cas.
Tut quai pudess laschar enavos ina impressiun intscherta e forsa er da nagina fidanza da la publicitad en ils organs da giudicatura.
Co vai vinavant?
Il cas n’è betg giud maisa. La dretgira superiura sto decider anc ina giada dal cas. Fatg è dentant, uschia da leger online tar inside-justiz.ch, er sch’ins decida pli strentg che la dretgira regiunala, dess quai tenor experts probabel ina reducziun da la sentenzia u dal chasti – quai pervia dal temp ch’igl ha duvrà fin tar in nov process.
Ord vista da l’unfrenda è quai en mintga cas fitg pesant che quai dura uschè ditg e ch’i va uss anc pli ditg. Ins stoppia propi sa dumandar: nua ch’ins stat e sco ch’i stat cun la protecziun da l’unfrenda tar ina violaziun, uschia noss redactur Toni Poltera che persequitescha quel cas.