La nova zona da planisaziun cumpiglia ina pli gronda surfatscha che la veglia. Ella vala a partir d’immediat, e quai enfin ils 24 d’avrigl da l’auter onn. Pertutgadas da questas restricziuns da bajegiar n’è betg mo il territori da Brinzauls, mabain era tscherts quartiers da Vazarouls, Surava e Casti.
Facticamain in scumond da bajegiar
La raschun per questas restricziuns è il fatg, che sch’igl avess da dar ina gronda crudada da crappa da plirs milliuns meters cubics material cun in’unda da pressiun, fissan tenor in’analisa era quels lieus periclitads. Quai scriva la vischnanca.
A partir d’immediat pon mo pli vegnir lubids projects da construcziun che correspundan a la nova zona da planisaziun. La schanza ch’igl avess da dar ina crudada da crappa da plirs milliuns meters cubics material valitescha la vischnanca il mument ed era per ils proxims mais sco pitschna.
