Siglir tar il cuntegn

Header

Vista or da l'auto en direcziun dal «rutsch».
Legenda: Vista or da l'auto en direcziun dal «rutsch». RTR, Federico Belotti
cuntegn

Brinzauls Gallaria da sondagi custa 35% dapli che previs

Ils 7 da schaner decida la vischnanca Albula/Alvra a l’urna davart il project per ina gallaria da sondagi a Brinzauls. Ils custs per il project èn s’augmentads per 35%.

En l’emprima stimaziun quintava la vischnanca Albula/Alvra anc cun custs da passa 7,8 milliuns francs, ussa muntan ils custs a bun 10,5 milliuns. Sco quai ch’igl è da leger en il messadi pertutgant la votaziun a l’urna, hajan ins vis en il rom da la planisaziun da detagl ch’il preventiv da l’emprim project na tanschia betg. Cun enconuscher dapli davart il sulom e pussaivlas cumplicaziuns, stoppia vegnir budgetà dapli.

90% dals custs pajan la Confederaziun ed il chantun, il rest vegn finanzià da la vischnanca, da l’Uffizi da construcziun bassa, da la Viafier retica e dad auters partenaris che profitan da la gallaria da sondagi. La gallaria planisada vegn ad avair ina lunghezza da passa 600 meters.

Pazienza è dumandada

Cun questa gallaria ch’ha il portal en il sid-vest da Brinzauls vulan ils geologs perscrutar meglier il terren che sa mova per dapli che in meter ad onn. La gallaria sezza n’ha anc nagina funcziun da drenascha. Ma grazia a questa gallaria pon ils geologs sclerir definitiv, sch’in project da drenascha pudess franar «igl rutsch» da Brinzauls. In eventual tunnel da drenascha pudess en il meglier cas vegnir construì a partir da la primavaira da l’onn 2022.

Bova sa mova anc adina ferm

En in’infurmaziun publica sur internet da mesemna saira ha la vischnanca Albula/Alvra infurmà, ch’ils moviments da la terra sajan anc adina sin aut nivel, ma constant. La muntogna sur Brinzauls sa movia per part dapli che set meters ad onn, la media saja tar circa tschintg fin sis meters. La vischnanca sezza tar la baselgia sa movia per 1,2 meters ad onn.

audio
Ils moviments dal terren a Brinzauls èn constant auts
02:40 min, Actualitad dals 28.01.2021.
laschar ir. Durada: 02:40 minutas.

La prognosa per ils proxims mais mussia dentant nagina tendenza, ch’i dess ina bova da crappa gronda (Bergsturz). Ils geologs quintan, che questa primavaira pudess la naiv che lieua chaschunar per moviments da la terra pli sperts, e la primavaira e la stad avessan ils moviments alura puspè da sa stabilisar.

RTR novitads 06:00

Artitgels legids il pli savens

Scrollar a sanestra Scrollar a dretga