La cumissiun «abitadi» da la vischnanca è vegnida tar la conclusiun, che Vazarouls n’è betg adattà per bajegiar novas chasas, en il cas che Brinzauls avess da vegnir evacuà. Bain haja gia dà tschertas resalvas gia avant, ma sajan quellas sa cumprovadas: Tenor il perimeter da donns actualisà, saja era il vest da Vazarouls betg pli adattà per in’eventuala translocaziun dals abitants. Perquai vegnia Vazarouls uss betg pli persequità enavant per construir novs abitadis.
Sco quai ch’i stat scrit plinavant en il bulletin actual da la vischnanca Alvra pertutgant la bova da Brinzauls, saja la schanza, che Brinzauls stoppia vegnir evacuà in di però anc adina pitschna – era sche la terra sa movia anc adina fitg ferm. La vischnanca sezza sa mova il mument per radund dus meters per onn.
