Sco quai ch’il geolog Stefan Schneider ha ditg, saja la muntogna sa quietada in zic durant la primavaira e la stad. Dentant cun 5 excepziuns cun blera plievgia, nua ch’ins haja mesirà gronds augments da las spertezzas dals moviments. Quels saja dentant adina puspè sa quietads spert. Ils dis cun blera plievgia haja quai mintgamai dà diversas crudadas da crappa, gronds craps na sajan dentant betg sa distatgads. Cun il cumenzament da la stagiun pli fraida saja sin basa da las experientschas dals davos onns puspè da quintar cun moviments pli gronds en la muntogna.
Tunnel da drenascha duai calmar ils moviments
Il december vegn la radunanza communala da la vischnanca Alvra a decider davart in credit da total 7,8 milliuns francs, per construir in tunnel da drenar la muntogna. Sche tut va tenor plan pudessan las lavurs sut la gestiun da l’uffizi da construcziun bassa dal Grischun entschaiver gia il matg. Cun questa mesira speran ils responsabels da pudair quietar ils moviments da la muntogna. Cun ina tala mesira han geologs gia gì success en auters lieus.
70 indigens ston temair da stuair ir
En il cas ch’i na gartegiass betg da purtar l’aua or da la muntogna, stuessan ils da Brinzauls tschertgar in abitadi en in auter lieu. La vischnanca è il mument vid elavurar in concept da dischlocar la populaziun. Pertutgads fissan da Brinzauls radund 70 abitants e 50 abitaziuns secundaras, ha la vischnanca eruì.
Avunda spazi per tuts en auters lieus
Actualmain datti a Brinzauls era il privel d’ina bova da crappa gronda (Bergsturz). La probabilitad d’ina tala bova è tenor ils geologs bain pitschna, tuttina sa prepara la vischnanca sin in tal scenari, che pertutgass era parts da Vazarouls, Casti e Surava. En il perimeter dals donns pussaivels sa chattan prest 300 abitaziuns cun ina surfatscha utilisabla da 34’000 meters quadrat.
En in’enquista è vegnì eruì, che stgars dus terzs vuless puspè chattar in dachasa en la vischnanca Alvra. La maioritad dad els vuless ir a Vazarouls, ils segund blers preferissan Alvagni. La vischnanca Alvra quinta che or da l’aspect da planisaziun dal territori avess la vischnanca d’avair avunda spazi per tuts che stuessan translocar.
