Siglir tar il cuntegn

Header

audio
Bova Brinzauls: Zona da planisaziun prolungada
Or da Actualitad dals 08.04.2022.
abspielen. Laufzeit 3 minutas 32 Sekunden.
cuntegn

Albula/Alvra Zona da planisaziun vegn prolungada per in onn

En connex cun la bova da Brinzauls, ha la vischnanca Albula/Alvra prolungà cun pitschnas midadas la zona da planisaziun per in onn. Quella zona da planisaziun muntia in scumond da bajegiar temporar. Ella vala per Brinzauls e per parts da Vazerouls, Casti e Surava.

Ad in’infurmaziun publica la gievgia saira ha la vischnanca Albula/Alvra infurmà, che la zona da planisaziun valia enfin ils 24 d’avrigl 2023 – pia in onn pli ditg. Suenter vegnia la situaziun analisada da nov. Il president communal Daniel Albertin ha ditg ch’i saja economicamain in grond dischavantatg, ma i dovria anc novas scuvertas pertutgant il terren da Brinzauls, che sa mova anc adina fitg ferm. El speria, ch'ins haja entaifer in onn avunda savida per ch’ins possia decider definitiv, sch’ins possia schliar la zona da planisaziun. Per il mument munta quella zona da planisaziun in scumond da bajegiar temporar.

La zona da planisaziun po vegnir diminuida sin la lingia dadens la frizza.
Legenda: La zona da planisaziun po vegnir diminuida sin la lingia dadens la frizza. mad

Situaziun preoccupanta

La situaziun en connex cun la bova da Brinzauls saja anc adina preoccupanta. Sco quai ch’il geolog Stefan Schneider ha ditg, sa movia il vitg da Brinzauls dapi intgins mais sin in livel aut da 1,50 meters ad onn. Ils moviments en la muntogna sajan sa stabilisads sin in aut livel. Là nua ch’il terren sa movia il pli ferm mesirian ins il mument radund diesch meters per onn.

Per l'emprima giada suenter corona è puspè public stà lubì a l'infurmaziun publica ch'è vegnida emessa era sur internet.
Legenda: Per l'emprima giada suenter corona è puspè public stà lubì a l'infurmaziun publica ch'è vegnida emessa era sur internet. Federico Belotti

Novas scuvertas

En connex cun la bova hai dà novas scuvertas, ha Schneider ditg plinavant. Uschia sappian ins ussa bler dapli sur nua che l’aua sa movia endadens da la bova. Quai saja ina savida impurtanta per il servetsch da preavertiment. Plinavant sappian ins ussa che tscherta crappa sin la muntogna crodia betg en direcziun la val mabain en direcziun muntogna – quai saja en quest senn positiv che tscherts pachets da crap tegnian meglier e sajan uschia pli pauc en privel da dar ensemen. Ins sappia uss er, ch’en il funs da la bova saja la zona che glischnia betg dapertut medem ferma ma interrutta cun parts che hajan moviments da cupitgar. Er quai saja ina scuverta positiva.

audio
Per tadlar: curt e cumpact
aus RTR Audio vom 08.04.2022.
abspielen. Laufzeit 1 minuta 1 Sekunde.

 

RTR novitads 06:00

Artitgels legids il pli savens

Scrollar a sanestra Scrollar a dretga