«Bavegna Gasthaus Belfort Alvaneu: Wir sind die Gäste, wo bleibt der Wirt?», è stà da leger. Cun quest’acziun ha la populaziun indigena vulì far attent sin la problematica, che bleras vischnancas dal Grischun han ustarias che serran. En ina vischnanca tutga ina baselgia ed in’ustaria, hai gì num. Il hotel Belfort è il mument vid e na chatta nagin ustier. Questa primavaira han uniuns pudì nizzegiar l’ustaria, l’acziun è tenor ils iniziants stada in success.
Hotel Belfort ha adina puspè novas ideas
I n’è betg l’emprima giada ch’il hotel Belfort dat da discutar: Il 2013 han ils possessurs dal hotel Markus ed Emma Beer empruvà da vender il hotel sur la plattafurma d’aucziuns da Ricardo. La vendita è dentant dada en l’aua: Il purschider ch’ha gudagnà l’offerta era ina persuna anonima che vuleva mo far ina sgnocca.
