Las funtaunas d'aua da zulpra ad Alvagni èn l'origin d'ina lunga istorgia da turissem. Questas funtaunas ed ils indrizs latiers han midà possessurs e possessuras gia dapi 1474. Da là datti l'emprim contract da cumpra. Chastellans da l'Austria e persunas dal lieu han possedì quels. Cun il traffic en il 18avel tschientaner è il turissem vegnì pli grond. Ils Simmens d'Alvagni han, tenor la Pro Bogn Alvagni, engrondì e renovà in hotel existent, ch'aveva 16 chombras cun blers letgs. Ils megliers onns èn stads ils onns 1860-1930. Suenter l'avertura da las vias sur las muntognas, pudevan er charrotschas e postas pli grondas passar ad Alvagni. Bleras persunas bainstantas da l'exteriur han passentà la stad en las muntognas per curar lur malsognas e medis da renum han pratitgà là. L'hotel da cura è sco davos vegnì manà cun success da Paul Beck. Suenter sia mort ha el midà pliras giadas possessur, il pli davos il 1963 en il mauns d'in um da Berlin. Suenter è il bogn vegnì serrà. Uschia èsi ì radund 40 onns, fin che las funtaunas da zulpra han puspè sgarguglià.
Renaschientscha dal turissem da cura
La renaschientscha dal turissem da cura ad Alvagni è vegni planisà da lunga vista. La speranza per questa renaschientscha ha il comité Pro Bogn Alvagni gì gia il 1987. Quel ha anc vulì reavrir l'hotel da cura vegl, ch'è stà vid dapi il 1963. El è mo pli stà ina ruina il 1987. Tenor «Schweiz Aktuell» haja la polizia da la citad da Turitg e l'armada svizra nizzegià quel per exercizis da sajettar. Da quai han foras d'entradas en il bajetg dà perditga.
Gia il 1987 ha il comité Pro Bogn Alvagni discurrì dà blers interessents, dentant paucs plans concrets. Dentant è suenter l'avertura da la plazza da golf vegnì moviment en la chaussa. La ruina dal vegl hotel da cura è vegnida spazzada.
Suenter l'avertura da la plazza da golf 1997 hai dà plans per in hotel da cura cun 300 letgs. Atgnamain è in hotel er stà ina cundiziun per dastgar bajegiar la plazza. Cura ch'il bogn d'Alvagni è vegnì avert, èn stads sin maisa plans per in bajetg cun pliras abitaziuns, in hotel ed in stabiliment da cura.
In nov bogn
Il 2001 è lura vegnì avert il nov bogn. L'aua da zulpra, vegn filtrada uschia che la savur è pli agreabla. E dasper il bogn datti saunas, fisioterapia ed in restaurant. Ina impurtanta contribuziun ha Hans Christoffel da Tavau fatg vi da quai. L'interprendider, che maina ina gronda fatschenta d'abitaziuns da vacanzas, è adina puspè s'engaschà en l'istorgia dal bogn ad Alvagni per quel. Sper Christoffel èn er 21 vischnancas e numerusas persunas da la regiun sa participadas da gliez temp, ed han signà aczias. En tut sajan quai stadas investiziuns da set milliuns francs.
Concurs
Suenter 20 onns ha la Bogn Alvagni SA declera il concurs. Las raschuns per il concurs èn diversas. En las medias ha Christoffel sez numnà la sminuziun da las pernottaziuns en la Val d'Alvra. Dapi 2009 sajan las pernottaziuns en la regiun sa sminuidas per la mesadad. Dapi là èn las entradas en il Bogn Alvagni idas enavos onn per onn. Mesiras da spargn e negoziaziuns cun la vischnanca Alvra n'han betg gidà. Il 2001 avevi 30 emploiads ed emploiadas, il 2020 anc 17. La primavaira 2021 ha il bogn serrà las portas, cun las speranzas da puspè avrir suenter la fin da las mesiras cunter la pandemia.
Il bogn ha cun quai gì ina curta fasa da success economic, ed ina lung'istorgia da difficultads finanzialas ch'è suandadas. El avess duì esser l'entschatta d'ina renaschientscha dal turissem da cura, ussa vegn el ingiantà.
Or da l'archiv