L'interess medial è stà grond, l'interess per cumprar il bogn ad Alvagni però pitschen. Il venderdi ha gì lieu l'ingiant per il bogn ch'ha serrà sias portas avant 3 onns. L'unica offerta ha Hansjürg Christoffel da Tavau fatg sco represchentant da la Christoffel Holding SA.
Quella è er la creditura principala da l'Implant. Per Daniel Albertin, president communal dal cumin d'Alvra, èsi ch'i na dat nagina midada dal possessur. El na spetga er betg cun gronds midaments en il proxim temp. Hansjürg Christoffel n'ha betg interess d'investir daners en la renovaziun u da purtar deficits en il futur, uschia ch'il bogn resta serrà per il proxim temp. Quai saja in putgà per la regiun, manegia Albertin. La vischnanca haja examinà da contribuir tar las sanaziuns dal bogn, dentant na saja quai betg stà avunda or da la vista dal proprietari.
I duvrass in svilup pli grond
La probabilitad da chattar in investur privat che ha interess vi dal bogn è tenor Hansjürg Christoffel fitg bassa. L'indriz sco tal na saja betg interessant avunda ed i duvrass in svilup pli grond da l'areal per auzzar l'attractivitad.
Ina pussaivladad pli probabla saja, da surdar la responsabladad al maun public, in quest cas al cumin d'Alvagni, sche quel fiss pront da surpigliar ils deficits annuals. «Fin uss n'è quai betg stà il cas. E sche quai po vegnir uss auter, dubitesch jau», di Christoffel. I saja però er in ses interess ch'il bogn possia puspè avrir las portas. La Christoffel Holding fiss pronta per soluziuns constructivas e mettess a disposiziun gratuit il bogn. Il custs per la renovaziun necessaria, sco er cifras cotschnas pussaivlas, na saja el però betg pront da surpigliar.
Il president communal d'Alvra fiss pront da discutar sur d'uschè ina proposta. «Quai fiss forsa er ina proposta sch'il cumin è er da l'opiniun, ch'il cumin duess surpigliar in tal burdi», di Albertin. Ina reavertura dal bogn n'è pia betg uschè datiers. Gia avant l'ingiant s'ha Albertin sa mussà en favur d'in ingiant dal bogn: «Or da vista da la vischnanca d'Alvra fissi ideal sch’il bogn vegniss ingiantà e nus vegnissan en favur dals debits ch’èn anc avant maun. Plinavant beneventassan nus sch'i dess puspè in affar turistic.» Er il president da Bravuogn Filisur Luzi Schutz ha ditg ch'el beneventass sch'il bogn fiss puspè avert, quai fiss ina purschida impurtanta per giasts ed indigens.
Strusch interess avant l'ingiant
Gia dapi il mars èsi stà enconuschent ch'il bogn vegn sut il martè. La Bogn Alavagni SA aveva deponì lura sia bilantscha e fatg libra la via per la procedura da concurs. Il bogn è vegnì serrà il 2020 e betg pli vegnì avert. Tenor l'uffizi da concurs da la regiun Alvra hajan ins procurà per il mantegniment minimal ils ultims trais onns. La raschun ch'il bogn è vegnì serrà èn stads motivs finanzials. Tenor il rendaquints è il dumber da visitaders e visitadras sa reducì cuntinuantamain.
L'interess per l'ingiant n'è betg stà grond. Ils 11 d'october 2023 avessan interessadas ed interessads gì la pussaivladad da visitar ed inspectar l'immobiglia. Fatg diever da quest'offerta n'haja dentant nagin, conferma Remo Cereghetti da l'uffizi da concurs, envers la FMR. Per l'ingiant s'eran annunziadas 10 persunas.
Il venderdi da las 10:00 è l'immobiglia lura vegnida ingiantada. Hansjürg Christoffel ha cumprà il bogn e l'ustaria per 1,8 milliuns francs. La surfatscha total èn 4'100 meters quadrats, la valur stimada dal l'uffizi da scussiun era tar 1'800'200 francs. Il bogn è vegnì construì l'onn 2001, tenor l'uffizi per la valitaziun d'immobiglias era la valur quella giada tar 4'643'405 francs.
Christoffel Holding SA involvida dapi ditg
Hansjürg Christoffel è il figl da Hans Christoffel, che aveva sustegnì il bogn sur onns. El è er il represchentant da l'acziunari principala, la Christoffel Holding SA, Christoffel aveva gia ditg en mars envers RTR che sia firma vegnia a sa participar a l'ingiant. La Christoffel Holdig SA è er la pli gronda creditura da la Bogn Alvagni SA. En vista a l'ingiant aveva Hansjürg Christoffel confirmà sia participaziun e ditg envers la FMR: «jau suppon che jau saja l'unic che vegn sa participar, ma exact na san ins quai betg ordavant.» In motiv per la cumpra è er che la Christoffel Holding SA posseda il dretg da pegn immobigliar (Grundpfandrecht) da var 4'000'000 francs. Quai vul dir che Christoffel po egualisar la cumpra cun quests daners, cun quai perda el var 2 milliuns, è dentant en possess dal bogn.
