Siglir tar il cuntegn

Header

audio
L’istorgia da las punts pendentas a Solas cuntinuescha a Losanna
Or da Actualitad dals 04.05.2022.
laschar ir. Durada: 4 minutas 8 Secundas.
cuntegn

Alvra Vischnanca va cun punts pendentas avant Tribunal federal

La regenza grischuna e tut ils uffizis al lieu, sco era las organisaziuns da l’ambient grischunas avevan dà glisch verda. Mo duas organisaziuns da l’ambient svizras han fatg recurs cunter il project. Perquai tira la vischnanca vinavant la sentenzia.

Ins veglia guardar sco il Tribunal federal decidia, ha ditg il president communal da la vischnanca Albula/Alvra Daniel Albertin envers RTR. I saja numnadmain vegnì investì blers daners e blera lavur en il project «Aventura Alvra». Ils custs da la procedura giuridica na duai dentant betg la publicitad purtar, mabain ils investiders dal project.

Gia la fin d'avrigl era Daniel Albertin sa mussà trumpà da la sentenzia da la dretgira administrativa. El ha dentant vulì sclerir sco prim la situaziun cun la suprastanza communala e la regiun Alvra avant che decider da trair vinavant la sentenzia a Losanna.

audio
Avrigl 2022: Vischnanca ponderescha da far recurs
ord Actualitad dals 19.04.2022.
laschar ir. Durada: 5 minutas 8 Secundas.

Organisaziuns da l'ambient han survegnì raschun

La Dretgira administrativa dal Grischun aveva dà suatientscha al recurs da la Fundaziun svizra per la protecziun da la cuntrada e da l’uniun Mountain Wilderness. Las uniuns per l'ambient avevan crititgà spezialmain ch'ins stuess runcar guaud per realisar il project cun las duas punts pendentas da 120 e 240 meters.

Il medem mument han la Fundaziun svizra per la protecziun da la cuntrada e l'uniun Mountain Wilderness era fatg recurs cunter la decisiun dal chantun d’avant dus onns. Quel aveva approvà la revisiun parziala dal territori da la vischnanca Alvra/Albula per insumma pudair realisar il project turistic. Gist questa revisiun n'avess il chantun però betg dastgà acceptar tenor la dretgira. Pertutgada fiss era la protecziun d’aua e la protecziun da monuments, cunquai ch'il project fiss er datiers da la lingia da tren ed uschia dal patrimoni cultural da l’Unesco.

En quasi tut ils puncts che Moutaintain Wilderness e la Fundaziun svizra per la potecziun e la tgira da la cuntrada han crititgà, ha la Dretgira administrativa dà raschun als accusaders.

RTR actualitad 15:00

Artitgels legids il pli savens