Il Center da sanadad Savognin fa grondas midadas da persunal. La direcziun interimistica survegn cun Stefan Schumacher, ch’era fin uss il schef da finanzas ina soluziun fixa e la gronda midada datti en il cussegl d’administraziun. Là resta mo pli ina persuna – tut tschels vegnan ad esser novs. Il redactur dad RTR Toni Poltera ha mess a lieu quellas midadas.
En il cussegl d’administraziun vegn quasi tut nov. Han ins pudì spetgar quai?
Toni Poltera: Ch'i dat ina midada – gea quai han ins pudì spetgar. Ch'i dat però gist uschè ina radicala, quai è però franc per blers ina surpraisa. Da tschel maun pon ins dir: las sfidas che spetgan il center da sanadad – spezialmain la part finanziala – èn gia fitg grondas e lura fa forsa in tagl radical senn.
Sche nus vulain gist guardar pli exact sin quest tagl radical. Tge persunalia fa surstar il pli fitg?
Fitg cler: che nagin da la suprastanza communala da Surses è pli en il cussegl d’administraziun. Fin uss era quai adina il president communal (la vischnanca è l'acziunari principal dal center da sanadad). Patric Vincenz, l'anteriur president da Savognin (anc avant la fusiun) vegn sin basa da mandat e sco delegà a represchentar la vischnanca. Però sco ditg, la vischnanca sezza n'è betg pli en il cussegl administrativ – quai è propi ina surpraisa. Da l'autra vart: ussa è la part politica e la part ospital separada pli cler – i na dat betg conflicts d’interess.
Patric Vincenz è damai vicepresident e delegà da la vischnanca – il post da president dal cussegl d’administraziun surpiglia Luzi Thomann.
Luzi Thomann è gia sa profilà avant bun in onn en chaussa cura ch'igl è vegnì preschentà ideas da manar l'ospital, per exempel mo pli sco ospital durant la stagiun d’enviern. El è là era quel ch'ha surpiglià ina rolla activa ed è s'engaschà per il center da sanadad en la gruppa d’interess. E che l'ospital resta.
Damai, è quai tenor tai ina dretga schelta?
En mintga cas ina consequenta pon ins dir. Luzi Thomann vegn da l’economia privata. Er ils davos onns è el stà president da l’uniun turistica e sco ditg è el s'engaschà fitg er en la gruppa da lavur per elavurar novas strategias per il center da sanadad e surtut da puspè sa revegnir finanzialmain. L'impuls da separar politica ed interpresa, quel vegn dad el.
Guardain anc sin il rest dal cussegl d’administraziun nov dal Center da sanadad Savognin. Tge è da dir qua?
Cun il deputà dal Cussegl grond Fabio Luzio è uss era la politica chantunala da la partida. Lea Moriggl vegn da la tgira, è ina giuvna che resguarda segir la vista dal persunal. E cun Fabio Berry, il sulet dal cussegl administrativ «vegl», han ins era anc in spezialist dal fatg. El è directur d'ina clinica ed enconuscha entras quai las sfidas dal sistem da sanadad.
Pon ins pia dir a Savognin: novas scuas scuan meglier?
Sch'igl è meglier sto il futur mussar. En mintga cas èsi franc bun da separar la politica e l'interpresa, la part strategica dal center da sanadad. Ch'il schef da finanzas Stefan Schumacher daventa uss directur suttastritga tge sfidas che spetgan: las finanzas.
Il cussegl administrativ sto la stad u il pli tard l'atun preschentar co ch'ins vul sanar las finanzas e tge mesiras ch'i dovra. In emprim signal che la populaziun stat davos l'ospital ed il center da sanadad hai dà l'avrigl: ins ha approvà dus milliuns francs a fonds perdu per restar liquid. La populaziun vegn a mesirar il success dal cussegl administrativ vi dal fatg quant fit che l'ospital vegn fatg per il futur. I spetgan numnadamain anc investiziuns pli grondas, per exempel en il bajetg.
Toni Poltera
Redactur Grischun Central
