L'impressari da lain Enrico Uffer è vegnì tar l'anteriura resgia comunala da Tinizong senza vulair. Cun s'occupar cun la materia è per el dentant svelt stà cler: La resgia dovra ina tscherta grondezza e la resursa lain duai vegnir nizzegiada al lieu. L'entschatta december 2022 duess la resgia nova «resurses» esser pronta e tagliar en media mintg'onn 50'000 meters cubic laina.
Proxim pass – in pass cun bleras eventualitads
Spert è era stà cler per l'impressari ch'il gudogn vegn fatg cun laina elavurada al lieu. Perquai vul Enrico Uffer gugent realisar ina fabrica d'elavuraziun da lain - il lieu ideal fiss Domat, sin il areal da l'anteriura resgia gronda.
Là sto dentant vegnir construì ina resgia gronda cun capacitad da 300'000 cubics – in'utilisaziun mo per elavurar laina, n'è tenor la planisaziun locala e las prescripziuns dal plan d'areal betg pussaivla. Quai conferma Bruno Maranta, il secretari dal Departament d'economia dal Grischun. Plinavant ha il chantun il pli baud l'onn 2027 la pussaivladad da cumprar las opziuns da la firma Pfeifer ch'ha il dretg da construir en il vest ina resgia gronda cun elavuraziun da lain (sin ina surfatscha da prest 8 hectaras).
