Igl è stà in cas dal tuttafatg spezial e fascinant: l'aual ch'è svanì sper Bravuogn. D'in di sin l'auter è quel culà avant bunamain dus onns en ina fora, e l'aua è cumparida in pau dapertut or da rusnas e sfessas. Uss han expertas ed experts perscrutà il sistem da cuvels sut la Val Tuors.
Il cuvel, nua che l'aua è tuttenina svanida, quel fatschenta vinavant las expertas ed ils experts. Geologas e spezialists da cuvels intercureschan uss quel sistem sutterran da taunas ed entran adina pli profund en in mund nunenconuschent.
Normalmain chatt'ins cuvels en regiuns cun crap da chaltschina. Ch'i dat uss qua en il dolomit in talmain grond cuvel è vairamain fitg insolit.
Spezial è era che quest fenomen è capità gia ina giada avant passa 100 onns. E tut e vegnì documentà fitg detagliadamain. I n'è dentant betg mo ina curiusitad. L'aua che vegn or dal terren ha chaschunà problems.
Perquai che l’aua ha chattà ina via tras la muntogna fin tar il crap da Bravuogn ed ha chaschunà d’enviern privel da glatsch sin la via chantunala, han ins stuì reagir. Er la soluziun avant 100 onns è stada la medema sco uss: Da sviar l’aual e stuppar puspè la rusna.
Las lavurs han custà stgars 1,3 milliuns francs ed èn ussa finidas. L'aua cula puspè en sia via usitada.
