Tranter Calantgil/Innerferrera e Campsut datti in grip sur la via ch’ha adina puspè chaschunà problems il davos temp. Ils davos cas èn capitads l’avust 2019 ed il matg 2021, nua che blera crappa è vegnida giu sin via. Durant divers dis ha la via mintgamai stuì vegnir serrada.
Durant in mais vegn siglientà
Quai duai ussa sa midar: Experts èn il mument vi da siglientar il grip problematic sur la via. Total 500 meters cubics material duain vegnir transportads davent cun radund 50 chargias camiuns, di Christian Hartmann, il responsabel da l’Uffizi da construcziun bassa, envers RTR. El quinta cun la chapientscha dals indigens, che ston quintar cun grondas restricziuns.
Temporarmain èsi pussaivel da passar
La Val Avras è cun quai – sche tut va tenor plan – mintgamai serrada durant ils lavurdis tranter las 7:30 – 11:45 e 13:00 – 17:30. Ina visita da RTR al lieu mussa che la glieud vul adina puspè passar cun l'auto malgrà la buna signalisaziun.
La chapientscha – saja quai da camiunists sco era l’emploiada da la Spitex Viamala – è dentant gronda. La dunna da la Spitex ha ditg, ch’ella saja leda ch’ella haja ina lubientscha speziala da pudair passar a pe il traject cura ch’i na dettia nagina crudada da crappa entras las lavurs. Perquai che sia collega en Val Avras na possia betg tractar suletta tut ils clients da la val.
