Val d'Avras serrada giu - Sch'il paun vegn cun il helicopter
La via en Val d'Avras tranter Innerferrera e Cresta è vinavant serrada. Perquai che la bova, ch'è vegnida giu sin via, sto vegnir rumida davent. Il mument è la Val d'Avras mo cuntanschibla cun helicopters u a pe. Perquai è il correspundent dal Grischun Central sa mess en viadi a pe.
Per arrivar a Giuf è noss correspundent, Federico Belotti, chaminà la mesemna davent da Bivio sur il Stallerberg – ina tura da trais uras. Da Giuf è el arrivà oz gievgia a bun'ura cun l'auto da posta fin ad Avras Cröt, nua ch'el ha pudì discurrer cun il president communal, Kurt Patzen:
audio
Bunura: Intervista cun Kurt Patzen, president communal dad Avras
03:54 min, ord Actualitad dals 15.08.2019.
laschar ir. Durada: 3 minutas 54 Secundas.
Sco che Patzen ha declerà, piglia la glieud ad Avras la situaziun actuala cun ina tscherta levezza. Per garantir a la glieud dad Avras da pudair ir a la lavur, ha la vischnanca drizzà en ina punt d'helicopter. Per ina contribuziun da 40 francs pon abitants e turists sgular or da la val isolada.
Las curunas en il Volg èn emplenidas
Sco che Christian Rösli ha declerà ad RTR, saja il provediment cun mangiativas per la Val d'Avras organisà fitg bain:
audio
Bunura: Il paun arriva cun il helicopter en la Val d'Avras
04:32 min, ord Actualitad dals 15.08.2019.
laschar ir. Durada: 4 minutas 32 Secundas.
Sias empustaziuns arrivan fin a Calantgil (Innerferrera) cun il camiun e davent da là cun il helicopter fin ad Avras Cröt. La vischnanca organisescha lura il transport fin en butia.
I dovra mintgatant in pau dapli organisaziun
La pura da Madris-Avras, Julia Patzen-Tscharner, na senta betg bler da quai che la via è serrada, i dovria en tscherts cas in pau dapli organisaziun. Cunquai ch'els sajan disads dad esser serrads giu mintgatant l'enviern, hajan els er avunda reservas da mangiativas en chasa:
audio
Mezdi: Julia Patzen-Tscharner è pura en Val d'Avras
03:47 min, ord Actualitad dals 15.08.2019.
laschar ir. Durada: 3 minutas 47 Secundas.
Per che ses uffants possian visitar il Circus Lolipop, ch'è il mument a Donat, han els dentant stuì ir in toc a pe. Sche la via è anc serrada, cura ch'ils uffants turnan dals dis da circus, possian els persuenter far il viadi cun l'helicopter.