L'idea da construir ina baselgia sper l'autostrada exista gia dapi otg onns. Dals 7 milliuns francs necessaris è garantida circa la mesadad. La finanziaziun è ina sfida, perquai che fundaziuns culturalas reageschan pli reservà che spetgà. Quai ha ditg Martin Cantieni, il vicepresident da la Fundaziun baselgia d'autostrada Andeer.
Impurtanza radunanza communala
In termin decisiv è ils 6 d'october: La radunanza communala d'Andeer vegn a votar davart la planisaziun locala che cuntegna il project da baselgia. Cantieni è da buna speranza: «Passa 80% da las votantas e dals votants han ditg Gea a la baselgia en l'ultima votaziun, ed uschia sperain nus ch'era la revisiun da la planisaziun locala vegnia acceptada.» En il cas optimal pudess la dumonda da construcziun vegnir inoltrada il segund quartal 2026. Sche tut va tenor plan duessan las lavurs da construcziun entschaiver il terz quartal. Ils architects renumads da Basilea Herzog & de Meuron èn responsabels per ils plans.
Betg mo in lieu spiritual
Martin Cantieni punctuescha l'impurtanza dal project per la regiun: «Jau crai che quai è in project fitg attractiv e nus avain survegnì reacziuns da las medias en 15 pajais». El na vesa la baselgia da l'autostrada betg mo sco in lieu spiritual, mabain er ina schanza per il turissem, cunzunt durant stagnaziuns dal traffic la stad.
Or da l'archiv