Ils davos tschintg onns han archeologas ed archeologs chattà ina massa mussaments da la preschientscha da legiuns romanas en Surses. Il servetsch archeologic dal chantun discurra d'ina scuverta «internaziunal extraordinaria».
Chattar in anteriur champ militar dals Romans è propi insatge unic
Armas, parts dad armaziun, guttas da calzers ubain muniziun per schlingias: Millis d'objects han las archeologas ed archeologs chavà or ils davos onns. Spectacular è er la scuverta d'in champ militar en la vischinanza da la Motta Palousa. Tenor ils archeologs saja il lieu dal champ stà adattà per controllar las valladas ed ils pass en la regiun.
Emprim champ da battaglia roman
Grazia a quellas scuvertas e tenor las retschertgas crajan ils archeologs ch'haja dà en vischinanza dal Crap Ses in cumbat tranter legiuns romanas e truppas reticas – quai en il rom da la campagna militara atras las Alps, ch'è vegnida lantschada l’onn 15 avant Cristus da l'emprim imperatur roman Augustus.
Exposiziun dals chats
L’exposiziun speziala en in container a Beiva raquinta da l'avanzada dals legiunaris en las Alps e da las scuvertas archeologicas, las qualas lubeschan da recapitular lur via. Grazia ad armas e parts da l'equipament dals schuldads romans survegnan las visitadras ed ils visitaders l’invista en quel schabetg istoric. Pli tard duessi l'exposiziun ir a Cuira.
La scuverta extraordinaria
Il project «Cumbat» è vegni lantschà dal Servetsch archeologic dal chantun Grischun grazia ad ina scuverta d'in stilet roman – ina scuverta fitg preziusa. Il stilet ch'il hobi-archeolog Lucas Schmid da Glion aveva chattà è vegnì preparà minuziusamain d’ina restauratura chantunala. Stilets da quest gener èn vegnids chattads mo fitg, fitg paucs. Quella scuverta ha dà il stausch, per lantschar il project scientific.
Novitads, eveniments ed istorgias localas. Tut tge che curra e passa en il Grischun Central chattais vus qua.