Servetsch archeologic - «Ins na sa mai tge che spetga propi»

Danunder che la fascinaziun per l'archeologia vegn precis na sa Marina Casaulta betg dir. Gia da pitschen ensi haja ella gì interess per il temp passà e per las antenatas ed ils antenats. Insatge dal pli bel vi da sia professiun saja ch'ins na sappia mai tge che spetga.

Las reacziuns da la glieud, sche la dunna da 36 onns raquinta ch'ella è archeologa, sajan dal tuttafatg positivas. La glieud mussia grond interess per sia professiun. Gia 10 onns lavura Marina Casaulta per il Servetsch archeologic dal Grischun.

Exchavaziuns actualas a Cuira

Avant ch'il grond project da bajegiar visavi a la Stadhalle vegn realisà, è il Servetsch archeologic dal Grischun en acziun sin quella parcella. Lur finamira: examinar e documentar perditgas archeologicas dal temp roman ch'ins chatta en il terren.

Lavurà vegnia plitost a la gronda che cun penels u pincettas. Cun in exchavatur vegn chavà fin tar quai che pudess esser interessant or da vista archeologica. Lura vai enavant cun zappun, pala e palutta, ed er il tschitschapulvra vegn savens en acziun. Els hajan spetgà da chattar structuras da bajetgs dal temp roman, mir n'han ellas ed els dentant anc chattà nagins.

Pitschnas scuvertas sco scalgias da cheramica u ossa d'animals demussan, co ch'ils umans han vivì avant 2'000 onns. Er sch'ins n'ha betg fatg scuvertas sensaziunalas sin l'areal a l'ur dal Welschdörfli, èn las scuvertas tuttina da grond'impurtanza. Quellas demussian nua che l'ur da la citad romana saja stà e co che la citad haja vesì ora.

Tut quai ch'è memia grond per prender en il museum, cataloghisar e magasinar vegn documentà cun fotografias e plans, uschia che las perditgas dal temp na svaneschan betg dal tuttafatg cura che las lavurs da construcziun sin la parcella entschaivan.