Il clima d’enviern che sa mida metta adina dapli sut squitsch pitschnas regiuns da skis. Era a Bivio daventa quai pli difficil d’avair avunda per l’entschatta da la stagiun, scriva la Bivio Sportanlagen AG (BISAG). Fin ussa vegnia producida naiv tecnica mo la pista standard tar il runal dal vitg.
Tar il runal da Tua manca la naiv
Per ils responsabels è perquai spezialmain impurtanta l’extensiun planisada tar il runal Tua, ch’è actualmain serrà pervi da memia pauca naiv natirala. Previs è da producir en l’avegnir naiv tecnica sin la mesadad sut. Uschia duai il manaschi dal runal vegnir segirà a lunga vista.
A medem temp possia vegnir garantida la traversa impurtanta vers Bivio. Tenor la BISAG meglierescha questa mesira cleramain la segirezza da naiv en l’entira regiun da skis. Plinavant daventia pli simpel da vegnir en garascha cun ils ratracs.
Ulteriuras investiziuns
Sper la naiv tecnica tar il runal Tua èn previsas ulteriuras mesiras. Quellas cumpiglian tranter auter la in nov indriz da cumond sco era l’installaziun d’ina segunda pumpa a Rons, ina correctura da la part superiura da la pista da cursa ed adattaziuns tar il runal Al Cant. Ultra da quai è planisada ina optimaziun dal parcadi Tua per giasts da di.
Finanziaziun betg anc garantida
Ils custs totals dals projects vegnan stimads sin radund 1,3 milliuns francs. La finanziaziun duai vegnir realisada tranter auter cun emprests, in’augmentaziun dal chapital d’aczias ed emprests convertibels. En discussiun sajan ils implants da sport era cun la vischnanca da Surses.
Ils custs supplementars annuals da manaschi vegnan calculads cun radund 150’000 francs. Tar in gudogn operativ annual da 200’000 fin 350’000 francs – dependent dal svilup da la stagiun – sajan quests custs supportabels per la BISAG.