In dals gronds magnets turistics dal Grischun duai il viaduct da la Landwasser e ses conturn daventar. La radunanza communala da Bravuogn Filisur ha approvà in credit da 510'000 francs per il project «Landwasserwelt.»
Ils custs per lantschar il project muntan a radund 11,6 milliuns francs. Quels vegnan tranter auter da la Viafier Retica, dal chantun, da vischnancas e da privats.
Ils daners vegnan investids per meglierar vias da viandar e spassegiar, tualettas publicas e mussavias. Cun il project «Landwasserwelt» duai il viaduct da la Landwasser daventar anc pli attractiv per visitaders e visitadras. Las vias ed ils puncts da panorama duajan sa meglierar. Plinavant duai dar ina staziun sut Schmitten, in bain puril d'aventura – ed er il museum da la viafier Alvra duai daventar pli attractiv.
