Siglir tar il cuntegn

Header

cuntegn

Inscenaziun Landwasser Test cun diversas attracziuns e staziun temporara

Il viaduct da la Landwasser e ses conturn duain vegnir inscenads e daventar in lieu d’excursiun da stad impurtant. Anc enfin la dumengia ils 18 d’october marscha in test cun diversas attracziuns. I dat er ina nova staziun da viafier.

«Schmitten Landwasserviadukt» sa numna la staziun provisorica nua ch’in tren istoric ferma regularmain durant il test. Davent da la staziun ins cuntanscha aifer tschintg minutas ina plattafurma cun ina grondiusa vista sin il viaduct da la Landwasser.

Attracziuns per grond e pitschen

I dat era bleras autras attracziuns, uschia cursescha in auter tren istoric da Filisur a Tagn/Wiesen. A Filisur hai in'exposiziun da vaguns istorics cun ina pitschna ustaria.

Ed en il vegl consum da Filisur ed en la staziun dad Alvagni èsi pussaivel da cumprar products da la regiun. A Filisur pon ins prender a fit trottinets electrics, e sin il bain puril da Andrea Paul Accola a Filisur pon ils uffants far rundas cun in pitschen tren a vapur, e visitar ils animals dal bain puril.

Sustegn dal maun public

Cun quests dis d’attracziun vul la regiun en collavuraziun cun la Viafier retica testar, co questas differentas attracziuns vegnan acceptadas dals visitaders. Il plan è, da far ina purschida permanenta a partir dal 2023. Il project vegn era sustegnì dal chantun e da la Confederaziun, quai en il rom da la nova politica regiunala NPR.

RTR actualitad 17:00

Artitgels legids il pli savens

Scrollar a sanestra Scrollar a dretga