La nova taxa da turissem ch’è in punct central da la nova lescha da turissem sa basa betg pli sin singulas taxas da cura, mabain sin pauschalas che resguardan la grondezza da l’abitaziun. En tut datti quatter zonas turisticas, a Bravuogn èn las taxas per exempel pli autas ch’a Valplana/Jenisberg nua ch’i dat pli pauca infrastructura turistica. La taxa per promover il turissem ch’i dat gia ussa, vegn mantegnida ed adattada a las cundiziuns actualas. La vischnanca da Barvogn-Filisur quinta cun entradas totals da passa in milliun francs, tge ch’èn radund 300'000 francs dapli ch’enfin ussa. Uschia saja stgaffida ina basa solida, da betg pli far mintg’onn in deficit, argumentescha la vischnanca. Da nov datti era in fondo per sviluppar projects turistics.
Pli veglia serenera dal Grischun duess serrar
Per remplazzar la serenera da Bravuogn è vegnì approvà in credit da planisaziun da 310‘000 francs. La serenera a Bravuogn ch’è vegnida construida ils onns 1960 è stada l‘emprima serenera en il Grischun. Ella na correspunda betg pli a las pretensiuns d'ozendi. Sche las lavurs da construcziun pon cumenzar l‘onn 2025, alura pudess la serenera nova ir en funcziun l‘onn 2027. Ils plans prevesan da manar l‘aua tschuffa da Bravuogn a Filisur e davent da là fin en l‘ARA existenta d‘Alvagni Bogn che duess vegnir engrondida.
