Cun blera critica è l’emploià, ch’ha ussa pers sia plazza, ì tar la gasetta «20 Minuten». Tar la sutgera sco era en vischnanca regia in caos, vi da l’obligatori da mascras sa tegnia mo mintga terz, ed era las distanzas minimalas tranter las persunas sajan per ils blers nagin tema, ha ditg l’um a la gasetta. In’autra pretensiun ch’el ha fatg è, ch’ils territoris da skis avessan da serrar perquai che blers na tegnian betg en las mesiras da corona.
Implants da sport n'han betg plaschair
Pauc plaschair vi da questa critica han ils Implants da Sport Bravuogn SA. Sco quai ch’il president dal cussegl d’administraziun Christoph Jäckle ha ditg envers RTR, na possian els betg acceptar ina tala illoialitad envers la fatschenta. Perquai sajan ins sa decidì da dar la disditga a l’emploià. Era Marc Andrea Barandun da Bravuogn-Filisur Turissem conferma, ch’ins n’haja betg gì gronds problems cun las reglas da corona, quai grazia a diversas mesiras.
Era vischnanca politica vegn activa
En ina brev publitgada avant curt, sa distanzieschan la vischnanca Bravuogn Filisur, l’organisaziun da turissem da Bravuogn-Filisur sco era ils Implants da Sport Bravuogn SA da las pretensiuns fatgas en l’artitgel da 20 Minuten. I sajan vegnidas fatgas diversas pretensiuns nunvairas sur dal turissem d’enviern a Bravuogn. Ins sa distanzieschia en tutta furma da quest rapport ch’engionia, è plinavant da leger en la communicaziun.
