Actualmain maina la Crusch blaua ina brocki a Tusaun. A partir da la primavaira da l’auter onn vegn quella transferida en il nov bajetg al stradun da manaivel da la staziun da Cazas. Per la Crusch blaua saja impurtant da pudair porscher tut or «d'in maun», ha ditg David Lederer, il manader da fatschenta da la Crusch blaua Grischun.
En la nova chasa duain emprendistas ed emprendists che visiteschan plazzas d'emprendissadi che pretendan ina savida pli profunda chattar in suttetg. Construidas vegnan trais abitaziuns e radund diesch studios.
Actualmain è la Crusch blaua anc sin la tschertga da crediturs che gidan da tegnair bass ils tschains da locaziun. La finamira saja da recaltgar credits en la valur da radund in quart milliun francs. Per sbassar ils custs da construcziun saja plinavant planisadas atgnas prestaziuns.
Termins d’avertura
Il Brocki shop e la logistica duessan avrir la primavaira da l’auter onn. La stad dal 2024 duessan lura esser pronts era ils studios e las abitaziuns. Per la construcziun dal bajetg è responsabla la Impact Immobiglias SA, che dat era a tschains il bajetg.
